Кіраўнік урада Каталоніі Карлес Пучдэмон заявіў пра тое, што мясцовыя ўлады абвесцяць рашэнне пра абвяшчэнне незалежнасці аўтаноміі цягам 24 гадзін пасля публікацыі вынікаў рэферэндуму. Пра гэта ён паведаміў падчас прэс-канферэнцыі пасля надзвычайнага пасяджэння жэнералітата (урада Каталоніі), перадае La Vanguardia.
Падчас выступу Пучдэмон, у прыватнасці, запатрабаваў вываду з тэрыторыі аўтаноміі Нацыянальнай паліцыі і Грамадзянскай гвардыі Іспаніі. Пасля беспарадкаў, якія адбыліся падчас рэферэндуму, улады рэгіёна, па яго словах, «вырашылі стварыць спецыяльную камісію для расследавання парушэнняў асноўных правоў» мясцовых жыхароў. У гэты орган, як дадаў кіраўнік жэнералітата, павінны будуць увайсці «эксперты і члены юрыдычнай каманды ўрада» Каталоніі.
«Я мяркую, што мы заслужылі права быць пачутымі, каб [на нашы праблемы] наўпрост звярталі ўвагу еўрапейскія інстытуты», — таксама адзначыў Пучдэмон.
Канфлікт паміж Барселонай і Мадрыдам ён назваў «не ўнутранай справай» адной краіны. «Відавочна, што [для ўрэгулявання сітуацыі] неабходна пасярэдніцтва трэцяга боку», — падкрэсліў ён, дадаўшы таксама, што для гэтага «павінен быць створаны клімат разрадкі».
Якія менавіта краіны або арганізацыі, на яго думку, маглі б выступіць падобнымі пасярэднікамі, Пучдэмон не ўдакладніў.
Дадзеных пра тое, што такую функцыю мог бы выканаць Еўрасаюз, ва ўладаў Каталоніі, як заўважыў кіраўнік жэнералітата, няма. Зразумела, што [далей] усё так не можа працягвацца», — сказаў таксама Пучдэмон.
«Нельга адмаўляцца ад пасярэдніцтва гэтак жа, як і [нельга] адкідаць дыялог», - адзначыў ён, падкрэсліўшы, што ў Барселоне не бачыць «больш эфектыўны спосаб» для вырашэння сітуацыі, чым перамовы.
Адсутнасць дыялогу паміж Каталоніяй і міжнароднымі арганізацыямі Пучдэмон назваў «часткай памылкі, якая заключаецца ў непрызнанні палітычнай праблемы» у рэгіёне. «Гэта сапраўды адбываецца, і чым пазней прызнаць гэтую рэальнасць, тым будзе горш», — сказаў палітык, чарговы раз адзначыўшы важную, на яго думку, ролю Еўрасаюза ва ўрэгуляванні сітуацыі. «Існуе праблема, якая закранае іх [ЕС] наўпрост, і яны проста не могуць глядзець у другі бок [і ня ўбачыць гэтага]», — адзначыў ён.
«Я не абвяшчаю незалежнасць [рэгіёна проста зараз]», - таксама заўважыў Пучдэмон. «Урад [Каталоніі] ўсвядоміў, што настаў час звярнуцца да пасярэдніцтва», — сказаў на заканчэнне кіраўнік жэнералітата.
Цяпер чытаюць
«У Віцебску заходзіў у тралейбус і казаў «Слава Украіне!». Украінца ў 67 гадоў пасадзілі за каменты, напісаныя пасля гібелі хроснай дачкі пад абстрэлам у Кіеве9
Каментары