Аб’ёмы газу, што «Газпром» прадае Еўрасаюзу, моцна знізіліся. Назіральнікі бачаць у гэтым спробу шантажаваць Еўропу напярэдадні магчымага нападу на Украіну. У адказ Еўропа ажыццявіла вялікія закупы звадкаванага газу.
У студзені «Газпром» паставіў у краіны ЕС 11,4 мільярды кубічных метраў газу — на 41% менш, чым у студзені мінулага года. Адначасова краіны Еўрасаюза набылі 11 мільярдаў кубаметраў звадкаванага газу, якія ў Еўропу вязуць па моры з усяго свету. Рашэнне дапамагчы Еўропе газам прыняў нават урад Японіі.
На сёння звадкаваны газ пакрывае ўжо 37% патрэб краін Еўрасаюза ў блакітным паліве, піша businessinsider.com.pl.
Змены на рынку — вынік таго, што значна павялічылася колькасць караблёў на трансатлантычных маршрутах паміж ЗША і Еўропай. Гэта здарылася пасля таго, як ў снежні 2021 года цэны на газ у Еўропе моцна выраслі.
У жніўні 2021 года газаправод «Паўночны паток — 2» прайграў суд у Дзюсельдорфе, згодна з якім вытворцы газу павінны быць юрыдычна аддзеленыя ад прадпрыемстваў, што транспартуюць паліва. У адказ «Газпром» перастаў прадаваць газ па доўгатэрміновых кантрактах праз электронную гандлёвую платформу ЕТР. Газаправод «Ямал-Еўропа» стаіць незапоўнены, а па трубаправодзе праз Украіну Расія транспартуе мінімальную колькасць газу.
Назіральнікі бачаць у гэтым спробу шантажаваць Еўропу напярэдадні магчымага нападу на Украіну і змусіць урад Нямеччыны пагадзіцца на адкрыццё газаправода «Паўночны паток —2» на ўмовах Масквы.
У выніку запасу газу ў еўрапейскіх сховішчах апусціліся да рэкордна нізкага ўзроўню. Але пастаўкі звадкаванага газу з Катара, ЗША і Японіі дазволяць еўрапейскім краінам спакойна выйсці з ацяпляльнага сезону.
Цяпер чытаюць
Мінскі гарадскі суд не вытрымлівае нагрузкі — не паспяваюць судзіць палітвязняў5
Каментары