Бучанская акруговая пракуратура абвясціла падазрэнне расійскаму вайсковаму, ураджэнцу Беларусі Сяргею Калацэю. Па звестках следства, ён расстраляў, сама меней, чатырох цывільных у Бучы, паведамляе «Слідство.Інфо».
Гаворка ідзе пра чатырох мужчын, целы якіх ляжалі каля будаўнічых матэрыялаў на адной з вуліц у Бучы. У некаторых мужчын былі звязаны за спінай рукі, такім чынам, яны былі закладнікамі. Забойства адбылося 18 сакавіка, аднак целы праляжалі да пачатку красавіка, пакуль у горад не ўвайшлі ўкраінскія вайскоўцы і праваахоўнікі.
Як высветлілі пракуроры, да расстрэлу быў датычны 35-гадовы беларус Сяргей Калацэй. Ён камандаваў адным з падраздзяленняў расійскіх акупантаў, якія здзяйснялі злачынствы ў Бучы. Некаторых мірных жыхароў яны бралі ў палон і катавалі, а іншых расстрэльвалі проста на вуліцы.
Першы абвінавачаны ў забойствах у Бучы беларус? Можа быць памылка: гэты чалавек двойчы судзімы
Момант забойства бачылі некалькі сведак. Адзін з іх змог нават запісаць на відэа гэтыя падзеі, дзе відаць месца расстрэлу і момант, калі адзін з акупантаў падымае руку са зброяй і затым раздаецца выстрал.
Сведкі пазналі Сяргея Калацэя на відэазапісе з беларускага паштовага аддзялення, дзе камера зафіксавала, як марадзёры адпраўлялі нарабаваную ва Украіне маёмасць сваім сваякам у Расію. Паводле паштовых дакументаў і відэа, Калацэй адпраўляў у горад Ульянаўск крышку багажніка аўтамабіля.
Журналісты па просьбе праваахоўнікаў дапамаглі ідэнтыфікаваць асобу Сяргея Калацэя, прааналізаваўшы яго твар на відэазапісы і яго даныя з паштовых дакументаў.
Падазраваны Калацэй нарадзіўся і вырас у Мазыры. Доўгі час займаўся адзінаборствамі, выступаў на лакальных спаборніцтвах. У сваіх сацсетках піша, што затым пераехаў у Расію, у прыватнасці, у Маскву.
Паводле пракуратуры Украіны, Калацэй мае дачыненне да падраздзялення Расгвардыі. Разам з іншымі падраздзяленнямі расійскіх акупантаў ён уварваўся на тэрыторыю Украіны, сцвярджаюць украінскія праваахоўнікі.
Хоць сам Калацэй адмаўляе сваю віну. Сваю версію ён выказаў у размове з карэспандэнтам «Можем объяснить».
«Я не служу ў Нацгвардыі. Вы што, з глузду з'ехалі?» — заявіў ён.
У якасці доказу віны Калацэя Генпракуратура Украіны апублікавала яго фатаграфію з паштовага аддзялення. Журналісты ўдакладняюць, што момант забойства бачылі некалькі сведак, пасля яны апазналі аднаго з забойцаў на відэазапісе з аддзялення кур'ерскай службы СДЭК у Мазыры, дзе расійскія вайскоўцы адпраўлялі дадому рэчы, як мяркуецца, нарабаваныя ва Украіне. Гэты чалавек перасылаў крышку багажніка аўтамабіля.
Калацэй адмаўляе ўсе абвінавачванні. «Тады ўкраінская пракуратура павінна абвінаваціць усіх, хто дасылае пасылкі ў Расію. Нагадаю вам, што гэтая арганізацыя з'яўляецца паштовым аддзяленнем, дзе любы можа адправіць пасылку каму заўгодна і куды заўгодна. Перш чым кагосьці вінаваціць у чымсьці, высветліце ўсе дэталі, інакш вас абвінавацяць у пагрозах і паклёпе на мірных грамадзян іншых дзяржаў», — настойвае падазраваны.
Мужчына заявіў, што не з'яўляецца грамадзянінам Расіі, у яго ёсць толькі пашпарт Рэспублікі Беларусь, дзе ён цяпер і знаходзіцца. Мужчына адмаўляе, што апошні час наведваў Украіну.
Ён таксама дадаў, што не будзе звязвацца з украінскімі ўладамі праз абвінавачванні ў катаваннях і забойствах. «Няхай свае памылкі і самі ліквідуюць. Гэта яны ў адказе за паклёп на іншых грамадзян», — сказаў на заканчэнне ён.
«Пра сустрэчу Луку заўсёды прасілі перадаць Пуціну». Шустэр расказаў, як Лукашэнка прапаноўваў свае паслугі амерыканцам9
Каментары