Лукашэнка спадзяецца перазапусціць адносіны з Захадам пры Трампе. Вось што напісаў пра яго блізкі паплечнік Трампа
Пасля перамогі Трампа Аляксандр Лукашэнка, падобна, спадзяецца на перазапуск адносін з Захадам. Ён павіншаваў новаабранага прэзідэнта ЗША і назваў яго перамогу «асабістым подзвігам». Менавіта прадстаўнікі адміністрацыі Трампа ў мінулым ездзілі ў Мінск. Гэта дарадца Трампа па нацыянальнай бяспецы Джон Болтан і дзяржсакратар ЗША Майк Пампеа. Цікава тое, як той візіт і ўспрыняцце Лукашэнкі Пампеа апісаў у мемуарах.
Майк Пампеа прылятаў у Мінск — у пачатку 2020 года. Тады ён заявіў, што ЗША не патрабуюць ад Беларусі выбіраць між Расіяй і Захадам. Ён таксама сказаў, што прагрэс Беларусі ў пытаннях правоў чалавека, свабоды прэсы і ўзмацнення ролі грамадзянскай супольнасці — адзіны варыянт для поўнага зняцця санкцый. У Мінску ён сустрэўся не толькі з Лукашэнкам, але і з прадстаўнікамі грамадзянскай супольнасці, сярод якіх быў будучы нобелеўскі лаўрэат Алесь Бяляцкі, і наведаў Парк высокіх тэхналогій, пра які вельмі высока адгукнуўся.
Да пасады кіраўніка дыпламатычнага ведамства ЗША Пампеа ўзначальваў Цэнтральнае разведвальнае ўпраўленне — на абедзве пасады яго прызначыў Дональд Трамп у час свайго прэзідэнцтва. Цяпер Пампеа лічыцца адным з галоўным замежнапалітычных дарадцаў Трампа.
І мяркуецца, што ён можа заняць высокую пазіцыю ў новай адміністрацыі пры Трампе. Магчыма, ён стане міністрам абароны.
Пампеа апісаў той візіт у мемуарах «Ніколі не адступлю ні на крок: змагаюся за Амерыку, якую люблю». Вось што ён згадваў пра паездку ў Мінск і Лукашэнку:
«У студзені 2020 я стаў першым дзяржаўным сакратаром за 25 гадоў, які наведаў Беларусь, краіну, якой амаль 30 гадоў кіраваў дыктатар і якая сёння знаходзіцца ў кабальным рабстве ва Уладзіміра Пуціна.
На працягу некалькіх месяцаў мы атрымлівалі сігналы пра тое, што прэзідэнт Аляксандр Лукашэнка спрабуе дыстанцыявацца ад Расіі.
Я не быў у захапленні ад ідэі сустрэчы з тыранам, але мне не сорамна сказаць, што грубыя геапалітычныя інтарэсы важнейшыя за дыпламатычны страх «легітымацыі» кагосьці кшталту Лукашэнкі.
Мая сустрэча з Лукашэнкам была ў нейкім сэнсе прадуктыўнай. Я сказаў яму, што Амерыка гатова пастаўляць прыродны газ у яго краіну, каб пакласці канец яго залежнасці ад расейцаў. Мы планавалі прызначыць нашага першага пасла з 2008 года — крок, які таксама дапамог бы ўмацаваць храбры касцяк каманды, якая абслугоўвала пасольства ЗША ў Мінску пад пастаянным беларускім і расійскім наглядам.
А потым усё пайшло наперакасяк. На сустрэчы ў нетрах свайго палаца ён гаварыў напышліва. Мае калегі думалі, што, раз наша закрытая сустрэча зацягнулася, усё прайшло пазітыўна. Насамрэч ён мне выносіў мозг расказамі пра розных уяўных ворагаў і тэорыі змоў. Пройдзе час, і выявіцца, што Лукашэнка ніколі ўсур'ёз не меў намеру праводзіць рэформы, і сёння ён несправядліва трымаецца за ўладу».
Пампеа дадаў таксама, што «дзяржсакратар, які не гатовы ісці на рызыкі, не будзе мець вялікага поспеху».
Цяпер чытаюць
Круты прызнаўся Лукашэнку, што акупнасць Беларусьфільма — 3%1
Каментары