Былога рэдактара «Бабруйскага кур'ера» Анатоля Санаценку арыштавалі на 15 сутак
Анатоля Санаценку затрымалі 28 сакавіка ў Бабруйску. У яго жыллі сілавікі правялі ператрус, паведамляе БАЖ.
31 сакавіка ў судзе Бабруйскага раёна і г. Бабруйска ў дачыненні Анатоля Санаценкі адбыўся адміністрацыйны працэс. Вінавацілі імаверна паводле арт. 19.11 КаАП РБ («Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або якая прапагандуе такую дзейнасць»).
Рашэнне суда — 15 сутак адміністрацыйнага арышту.
Раней Анатоля Санаценку затрымлівалі ў верасні 2022 года. Яго двойчы судзілі паводле ч. 2 арт. 19.11 КаАП РБ. Журналіст правёў за кратамі ізалятара часовага ўтрымання 30 сутак.
Тады ж Міністэрства інфармацыі Беларусі заблакавала доступ да сайта «Бабруйскага кур'ера» — babruysk.by. А 26 верасня 2022 года суд Бабруйскага раёна і г. Бабруйска сваім рашэннем прызнаў матэрыялы сайта экстрэмісцкай інфармацыйнай прадукцыяй. З таго часу «Бабруйскі кур'ер» перастаў існаваць.
Каментары