Луцк, Жытомір і Цярнопаль былі ў эпіцэнтры ўдараў Расіі шахедамі і ракетамі
Расія ў ноч на 9 ліпеня здзейсніла вялікую камбінаваную атаку па Украіне ўдарнымі дронамі, крылатымі ракетамі і аэрабалістычнымі «Кінжаламі», паведамляе Бі-бі-сі — Украіна.
Паводле звестак Паветраных сіл, Расія атакавала пераважна захад Украіны, у прыватнасці найбольшая пагроза была Луцку, Цярнопалю і Жытоміру, шахеды дасягалі Львоўшчыны і Івана-Франкоўшчыны.
Масіраваная атака працягвалася ўсю ноч і пачалася яшчэ познім вечарам 8 ліпеня. Паветраную трывогу па ўсёй краіне адмянілі каля 6-й раніцы, але яна яшчэ працягвалася на Валыні.
Яшчэ да поўначы ва Украіну заляцелі сотні «шахедаў», якія праз цэнтр Украіны, у тым ліку і Кіеў, накіроўваліся на заходні напрамак. У Кіеве ўсю ноч было чутно гукі працы СПА і выбухі, аднак пра разбурэнні ўлады не паведамлялі.
Бліжэй да апоўначы расіяне запусцілі першую хвалю аэрабалістычных «Кінжалаў», якія атакавалі Жытомір — маніторынгавыя тэлеграм-каналы дапускалі, што ўдар мог быць па авіябазе ў Азёрным.
«Шахеды», паводле звестак Паветраных сіл, пераважна рухаліся на захад, але маглі атакаваць Стараканстанцінаў, дзе размешчаная авіябаза. Частка накіроўвалася ў бок Цярнопаля і Луцка.
Акрамя «шахедаў», па Луцку таксама ўдарыла другая хваля «Кінжалаў», якія Расія запусціла амаль а трэцяй ночы.
Пазней ва Украіну заляцела група крылатых ракет з наземных пускавых установак.
Мэр Луцка Ігар Палішчук амаль усю ноч паведамляў пра атаку на горад «шахедамі», «кінжаламі» і крылатымі ракетамі.
Поўны адбой трывогі па ўсёй Украіне абвясцілі ўжо пасля 6:17 раніцы.
На гэты момант інфармацыі пра загінулых у выніку варожай атакі няма.
Дзяржаўныя сацыёлагі: Беларусы найперш звязваюць сваю дзяржаўнасць з Вялікім Княствам Літоўскім24
Каментары