Новыя кнігі, дасланыя ў рэдакцыю

Новыя кнігі, дасланыя ў рэдакцыю

М.Раманюк. Беларускія народныя крыжы / Рыхт., падбор іл. і макет Дз.Раманюка. – Вільня: Наша Ніва, Дзяніс Раманюк, 2000. – 222 с.: іл. – Наклад 1500 ас. ISBN 9955-437-08-1

Беларусь: Факты: Справочник / Авт.-сост. С.Самуэль. – Менск: ВТАА «Кавалер паблішэрз», 2000. – 448 с.: іл. – Наклад 1500 ас. ISBN 985-6427-33-9

У даведніку падаюцца рознабаковыя зьвесткі пра жыцьцё беларускае дзяржавы: тэрыторыю, эканоміку, дзяржаўны лад, сацыяльную сфэру, ахову здароўя, адукацыю й навуку, кнігавыдавецкую справу, культурнае жыцьцё, архітэктуру, рэлігію, фізычную культуру й спорт, турызм. Добра аздобленая каляровымі фатаздымкамі, кніга прызначаная для замежных турыстаў і выдадзеная на замову выстаўнага цэнтру «Белэкспа».

П.Трус. Выбраныя творы / Уклад., прадм. і камэнт. Г.Запартыкі. – Менск: Беллітфонд, 2000. – 384 с., (8) іл. – Наклад 4000 ас. ISBN 985-6576-13-Х

У кнізе сабраныя ўсе вядомыя на сёньня вершы, паэмы, празаічныя творы, лісты Паўлюка Труса (1904–29). Дакумэнты, зьвязаныя з П.Трусам, дадаюць шмат цікавых штрыхоў да малюнку эпохі савецкае беларусізацыі. У кнізе ўпершыню надрукавана колькі цікавых фатаздымкаў самога П.Труса ды ягоных сучасьнікаў і настаўнікаў Я.Бялькевіча, М.Грамыкі, Ю.Дрэйзіна, А.Круталевіча, У.Кудрэвіча, Я. і А.Лёсікаў, А.Міцкевіча, М.Піятуховіча. Каштуюць “Выбраныя творы” 930 р. Неўзабаве ў “зялёнай” сэрыі “Беларускага кнігазбору” выйдзе кніга навуковых прац і біяграфічных матэрыялаў пра гісторыка Міколу Ўлашчыка.

А.Петрашкевіч. Воля на крыжы: Гістарычныя п’есы. – Менск: Мастацкая літаратура, 2000. – 271 с. – Наклад 2000 ас. ISBN 985-02-0437-0

У зборнік увайшлі гістарычныя драмы й трагедыі Алеся Петрашкевіча: «Гора й Слава», «Меч Рагвалода», «Напісанае застаецца», «Прарок для Айчыны», «Воля на Крыжы». Раю зважыць на п’есу «Воля на Крыжы», прысьвечаную драматычнаму жыцьцю Янкі Купалы ды інтэлігентаў у 1930-я гг. П’еса рыхтавалася на паказ у Купалаўскім тэатры. Сам назоў «Воля на Крыжы» А.Петрашкевіч узяў з паэмы Міхася Чарота «Босыя на вогнішчы». Кніга выдатна аздобленая і каштуе ўсяго 800 р.

Зянон. Глёрыя Патрыя: Вершы й фатаграфіі 1980-х гг. / Пад рэд. У.Арлова, Прадм. Р.Барадуліна, Маст. П.Драчоў. – Вільня: Тав-ва бел. культуры ў Літве, 2000. – Наклад 1000 ас. ISBN 9986-9228-7-9

А.Гужалоўскі. Нараджэньне беларускага музэю. – Менск: Нацыянальны архіў Рэспублікі Беларусі, 2001. – 124 с.: іл. – Наклад 1000 ас. ISBN 985-7372-17-8

Разглядаецца станаўленьне музэяў на этнічных абшарах Беларусі пры канцы ХІХ – на пач. ХХ ст. Каштуе 1,5 т.р.

У.Караткевіч. Хрыстос прызямліўся ў Гародні: Раман. – Менск: Беллітфонд, 2000. – 496 с.: іл. – Наклад 5000 ас. ISBN 985-6576-14-8

Славутым раманам У.Караткевіча выдавецтва “Беллітфонд” распачало новую кніжную сэрыю “Беларускі гістарычны раман”. Наступнымі маюць зьявіцца творы: А.Пашкевіча “Пляц Волі” (пра Слуцкі збройны чын 1920 г.), К.Тарасава “Пагоня на Грунвальд”, В.Іпатавай “Залатая жрыца Ашвінаў”. Цана першае кнігі сэрыі – 2,7 т.р.

Віктар Мухін