«Biełaruś-1» pakazaŭ hnieŭny siužet pra žurnalista Tut.by, jaki zasumniavaŭsia ŭ dasiahnieńniach Łukašenki ŭ chakiei VIDEA

Historyja zakruciłasia 4 studzienia — u dzień pačatku Kaladnaha turniru na pryzy prezidenta. Zvyčajna spartyŭnyja biełaruskija ŚMI nie asabliva nadajuć uvahu hetym spabornictvam, pakidajučy jaho aśviatleńnie na dolu dziaržvydańniaŭ. Ale na hety raz žurnalist Sport.Tut.by Juryj Michalevič vyrašyŭ zrabić štości novieńkaje: upieršyniu za čas praviadzieńnia turniru ŭ internecie źjaviŭsia padrabiazny technika-taktyčny analiz hulni kiraŭnika dziaržavy (prafiesijnyja chakieisty i śpiecyjalisty zaŭsiody admaŭlajucca davać padrabiaznuju charaktarystyku chakiejnym zdolnaściam Alaksandra Łukašenki, chiba što adznačajučy jaho mahutny kidok). Michalevič ŭvažliva sačyŭ za dziejańniami i ajs-tajmam prezidenta ŭ matčy sa šviejcarcami i staranna vykłaŭ usie svaje nazirańni ŭ tekście. Pryčym usio było dosyć kanstruktyŭna i amal biez adkrytaj krytyki. Pačytać było vielmi cikava.

Miarkujučy pa ŭsim, razbor hulni prezidenta mima prezidenta nie prajšoŭ — za dzień da finału turniru žurnalistu patelefanavali. Voś što raspavioŭ Michalevič u svaim nastupnym tekście:

— Mabyć, naviersie rabotu «Razbor biez prykras. Jak hulaje ŭ chakiej Alaksandr Łukašenka» niejkim čynam acanili. Inakš čamu za dzień da finału Kaladnaha turniru sa mnoj źviazalisia ludzi ź Ministerstva sportu i turyzmu z prapanovaj papracavać z akredytacyjaj? A ŭsiaho niekalki dzion tamu jany admaŭlalisia lehalizavać pracu partała na spabornictvach. Niejmavierna.

Bolš za toje, paśla matču Michaleviča navat dapuścili ŭ mikst-zonu i dazvolili prysutničać na hutarcy prezidenta z presaj — dla žurnalista «niepryvilejavanaha» ŚMI reč heta redkaja.

Pavialičyć

Łukašenka łaskava pahutaryŭ z usimi i navat adkazaŭ na dva pytańni žurnalista Tut.by. Akramia hetaha, kiraŭnik krainy padaryŭ Michaleviču svaju klušku sa svaim ža aŭtohrafam. Za što? Ci to chacieŭ adździačyć za jakasna praviedzieny razbor hulni, ci to pa niejkich inšych pryčynach — tut možna tolki zdahadvacca. Žurnalist ža adrazu adznačyŭ, što płanuje vystavić prezient na dabračynny aŭkcyjon.

Zdavałasia b, pryhožaja historyja atrymałasia. Adnak niadzielnym viečaram usio źmianiłasia kardynalna. U pieradačy «Hałoŭny efir» na telekanale «Biełaruś-1» Michaleviču zładzili, jak pryniata kazać, sapraŭdny «adłup». Viadučyja pieradačy adznačyli maładość aŭtara, raskrytykavali «Razbor biez prykras», paviarchoŭna prajšlisia pa tekście, pasprabavali znajści niedakładnaści i padmacavali svaje mierkavańni kamientarami z foruma. Darečy, pryviedzienyja kamientary ad karystalnikaŭ Tut.by atrymlivali značna bolš dyzłajkaŭ, čym łajkaŭ. Ale heta zusim inšaja historyja.

Bolš za toje, karespandent ATN navat uziaŭ intervju ŭ Michaleviča. Cikava, što da jaho źviartalisia na «ty». I kali spačatku žurnalistu TUT.BY zadavali całkam biaskryŭdnyja pytańni (ci daŭno Juryj sam hulaŭ u chakiej i inšaje), to zatym ni z taho ni z hetaha zładzili jamu pravierku na viedańnie chakiejnych praviłaŭ. Michalevič testu nie vytrymaŭ, a «Hałoŭny efir» heta z radaściu pakazaŭ.

Darečy, viadučy «Hałoŭnaha efiru» Ivan Ejsmant (pracuje pad psieŭdanimam Ivan Michajłaŭ) źjaŭlajecca mužam pres-sakratara prezidenta Natalli Ejsmant, jakaja dapamahała Michaleviču ŭ znosinach z kiraŭnikom dziaržavy ŭ mikst-zonie. A voś razam ź siastroj Ivana — Hannaj Ejsmant — Michalevič pracuje nad prajektam «Dynama Inside».

Tak na adzin viečar karespandent «nieviadomaha» resursu (u efiry «Biełaruś-1» nazva TUT.BY nie prahučała ni razu) naroŭni z Łukašenkam staŭ hałoŭnym hierojem prajm-tajma.

• 0
• 0
• 0
• 0
• 0
• 0
• 0
• 0