Na «Biełaruś 2» startuje intelektualnaje šou z zamanlivym pryzam — vandroŭkaj u Amsterdam, Prahu ci Paryž

Na telekanale «Biełaruś 2» u kancy sakavika startuje intelektualna-zabaŭlalnaje šou «Vieža». Zdymki pieršaha siezona zavieršany, i ŭ chutkim časie publika ŭžo zmoža nazirać za hulnioj tych kamandaŭ, jakija pieršymi vyprabavali siabie i svaje viedy ŭ novym farmacie, piša «Źviazda». 

— My analizavali šmatlikija viktaryny pa ŭsim śviecie i imknulisia stvaryć niešta zusim nie padobnaje na prahramy takoha kštałtu, što ŭžo isnujuć u teleprastory. Da taho ž chaciełasia zrabić prajekt, dzie prysutničała b i nacyjanalnaja ideja. Pačali hladzieć našy simvały, i Biełaja vieža stała, možna skazać, pravobrazam našaj «Viežy». Sprabavali roznyja varyjanty, a potym adšturchnulisia ad prostaha — zrabili staŭku na emocyi, a dla pabudovy viežy stali vykarystoŭvać kubiki ź niaroŭnymi krajami, — kaža pradziusar i kiraŭnik prajekta Jahor Šolkin.

U kožnym vypusku šou buduć udzielničać dźvie kamandy pa try čałavieki. U troch dziesiacichvilinnych turach kožnaja ź ich nazapašvaje «resursy» dla budaŭnictva viežy ŭ finale. U pieršym tury kamandy pa čarzie adkazvajuć na pytańni, u druhim kožny ŭdzielnik piša svaje adkazy asobna na papiery, a ŭ trecim tury — na ahulnaje pytańnie kamandy navypieradki šukajuć adkaz. Pry hetym na lubym etapie hulni za niapravilny adkaz hulcoŭ čakaje pakarańnie — pabudova toj samaj viežy.

Adnaho tolki intelektu niedastatkova dla pieramohi. Nieabchodnyja jašče łohika, psichałohija, taktyka i viera ŭ toje, što teoryja imaviernaściaŭ budzie na vašym baku. U supierhulni vieža taksama vyrašaje ŭsio, ale ŭžo pa svaich praviłach: kolkaść nabranych bałaŭ vyznačaje siekundy, za jakija kamanda buduje viežu, a ličba niapravilnych adkazaŭ — kolki elemientaŭ treba skarystać u budaŭnictvie.

Što da samoha pryza, to ŭ novym šou možna vyjhrać vandroŭku dla ŭsioj kamandy. Pakul siarod varyjantaŭ na vybar — trochdzionnaja pajezdka ŭ Amsterdam z mahčymaściu pahladzieć Manietnuju viežu, vajaž u Prahu, kab zavitać na viežu na Karłavym moście, ci vandroŭka ŭ Paryž da Viežy Manparnas. Skarystacca svaim pryzam možna na praciahu hoda.

U pieršym siezonie zmahacca buduć kamandy žurnalistaŭ, artystaŭ Opiernaha i Kupałaŭskaha teatraŭ, himnastaŭ, udzielnikaŭ rali «Dakar» i mnohija inšyja. Stvaralniki prajekta adznačajuć, što spačatku kamandy nabirali siarod achvotnych, a ŭ pierśpiektyvie ich, mahčyma, buduć zaćviardžać praz adbory.

Viadučym novaha prajekta staŭ Vasil Čechaŭ, viadomy pa rabocie na radyjo i ŭ prajekcie «Viačera nie patrebnaja» na «Biełaruś 2». Jaho kandydaturu zaćvierdzili biez kastynhu, choć papiarednie razhladali inšych pretendentaŭ. Samym składanym akazałasia nie źniać prajekt, a vyrašyć usie pytańni nakont viežy: elemienty dla jaje pabudovy raspracoŭvali z dapamohaj matematyčnaj prahramy, ale pry ich vyrabie ŭźnikali pytańni i zaminki z vybaram materyjału (spynilisia na hukaizalacyjnych listach, jakija hruntavali i potym farbavali) — kab jon byŭ zručny i biaśpiečny dla hulni.

Razam z tym byŭ važny i momant niečakanaści — uzvodzić viežu pavinna być nasamreč składana. I ŭsio ž teoryja imaviernaściaŭ na pytańnie «być prajektu ci nie być» dała stanoŭčy adkaz. Užo ŭ nastupnuju subotu, 28 sakavika, nazirajcie za hulnioj na «Biełaruś 2».

• 0
• 0
• 0
• 0
• 0
• 0
• 0
• 0