U Minsku pamior 13-hadovy padletak. Kala troch tydniaŭ tamu jon pieranios kavid

Ranicaj 16 śniežnia ŭ reanimacyi dziciačaj infiekcyjnaj balnicy Minska pamior 13-hadovy Micia Konieŭ. Pa słovach jaho maci Volhi, u listapadzie usia siamja pierachvareła na karanavirus. Kali karancin skončyŭsia, usie pačuvalisia dobra. Ale ŭ śniežni stan Mici rezka pahoršyŭsia, padniałasia i trymałasia vielmi vysokaja tempieratura. 15 śniežnia chłopčyku stała ciažka dychać, jaho advieźli ŭ balnicu i padklučyli da aparata ŠVŁ. Praź mienš čym sutki jaho serca spyniłasia, piša Tut.by.

Pavialičyć

Strašnaja navina ŭ siamju Volhi Konievaj pryjšła ranicaj 16 śniežnia: u 5:54 pamior jaje starejšy syn Micia. Jamu było 13 hadoŭ, jon vučyŭsia ŭ 7 kłasie.

U paśviedčańni ab śmierci, kaža Volha, pakazana try dyjahnazy: «Sardečna-lohačnaja niedastatkovaść. Virusnaja pnieŭmanija. Karanavirusnaja infiekcyja».

— My zachvareli na COVID-19 u pačatku listapada. Ja zdała test płatna, adstajaŭšy z pavyšanaj tempieraturaj niekalki hadzin u čarzie na vulicy: u paliklinicy jaho brać nie chacieli. U mianie paćvierdziłasia najaŭnaść virusa. Paśla hetaha razam z małodšym synam ja lažała ŭ balnicy, u jaho ŭziali test pry špitalizacyi. A Micia byŭ doma. Pačuvaŭsia narmalna, tolki pachi straciŭ. Test u jaho tady tak i nie ŭziali.

Pa słovach Volhi, COVID-19 jany pieranieśli adnosna lohka. Karancin skončyŭsia, usie pačuvalisia narmalna. Jana sama vyjšła na pracu, a Micia — na vučobu.

— Ale praz try tydni, u minuły čaćvier, u jaho zabaleła horła. U piatnicu pryjšoŭ doktar i pastaviŭ dyjahnaz «anhina». Prapisaŭ antybijotyki. Niekalki dzion trymałasia vysokaja tempieratura — kala 40 hradusaŭ. U niadzielu my vyklikali chutkuju, bo nie mahli jaje źbić. Doktar paćvierdziŭ anhinu i prapisaŭ vialikuju dozu antybijotyka, a taksama haračkapanižalnaje. U paniadziełak Miciu stała vanitavać, irvała ceły dzień. Znoŭ pryjšoŭ učastkovy doktar. U aŭtorak synu stała ciažka dychać. Ja vyklikała chutkuju. Prykładna ŭ 14:00 jaho advieźli ŭ dziciačuju infiekcyjnuju balnicu i praktyčna adrazu padklučyli da aparata ŠVŁ.

Volha kaža, što ŭ balnicy ŭ Mici ŭziali test na antycieły. Jak patłumačyŭ joj doktar, u jaho kryvi vyjavili vialikuju kolkaść antyciełaŭ IgG. Heta značyć, što Micia ŭžo pierachvareŭ na COVID-19.

— Napeŭna, heta adbyłosia ŭ listapadzie, kali ja chvareła. Micia pieranios infiekcyju praktyčna bieśsimptomna. Tolki pachi źnikli. Synu 13 hadoŭ. U jaho nie było niejkich surjoznych zachvorvańniaŭ. Adzinaje, jon byŭ alerhikam z atapičnym dermatytam. Tamu ŭ jaho zaŭsiody byŭ asłableny imunitet. Ale serca i lohkija zaŭsiody byli ŭ paradku.

U 5:54 ranicy 16 śniežnia Micia Konieŭ pamior. Raźvitańnie ź im pavinna prajści siońnia, 17 śniežnia.

— Micia vielmi lubiŭ matematyku, asabliva hieamietryju. Sprabavaŭ prahramavańnie, i ŭ jaho niadrenna atrymlivałasia. A ŭ hetym hodzie ŭ jaho pačałasia chimija, i jon byŭ vielmi zachopleny, — znachodziačy ŭ sabie siły, raspaviadaje pra syna Volha. — Jon hladzieŭ šmat videa pra kvantavuju chimiju i fiziku. Kazaŭ, što chimija — jaho lubimy pradmiet. Za pieršuju čverć vyvučyŭ amal usiu tablicu Miendzialejeva. Lubiŭ uroki hramadaznaŭstva, jamu padabaŭsia nastaŭnik. Kazaŭ, što choča być da jaho padobny. Da hetaha Micia maryŭ stać psichołaham. I ŭ jaho atrymałasia b. Jon byŭ vielmi hłyboki chłopčyk. Lubiŭ uroki ruskaj litaratury. Nie vielmi lubiŭ čytać, ale jamu vielmi padabałasia razvažać na ŭrokach, pisać vielmi hłybokija sačynieńni. Doma zasiedžvaŭsia ŭ kampjutary. Vielmi lubiŭ kampjutarnyja hulni. Niekalki hadoŭ źbiraŭ hrošy na novy manitor, chacieŭ kupić jaho paśla Novaha hoda.

Jon byŭ vielmi darosłym dla svaich hadoŭ. Ja davała jamu kartku, i jon apłačvaŭ rachunki, zamaŭlaŭ dastaŭku vady dadomu, afarmlaŭ pakupki ŭ internet-kramach. Hladzieŭ šmat videa pra palityku i zaŭsiody analizavaŭ situacyi vielmi tonka.

Vielmi chacieŭ pajechać u Japoniju. Jaho začaroŭvała kultura hetaj krainy. A jašče Micia składaŭ elektronnuju muzyku. U jaho dobra atrymlivałasia. Letaś napisaŭ dźvie pieśni ŭ styli rep. Ź vielmi doŭhim tekstam. Ale saromieŭsia i tak i nie zapisaŭ klip.

Z pytańniami, ci mahło takoje rezkaje paharšeńnie zdaroŭja stać śledstvam pieraniesienaj infiekcyi COVID-19 i ŭ jakim vypadku ŭ dziciaci mohuć raźvicca surjoznyja ŭskładnieńni, Tut.by źviarnuŭsia ŭ pres-słužbu Ministerstva achovy zdaroŭja. Tam rastłumačyli, što pakul dać kamientar nie mohuć: u dadzieny momant idzie analiz, jaki zojmie niekatory čas.

• 0
• 0
• 0
• 0
• 0
• 0
• 0
• 0