Daśledčyki nadrukavali na 3D-pryntary chatku z pryrodnych materyjałaŭ. Sabrać jaje možna za paŭdnia
Daśledčyki z Univiersiteta štata Men ličać, što jany, mahčyma, znajšli rašeńnie prablemy deficytu žylla.
Vykarystoŭvajučy adzin z najbujniejšych na Ziamli 3D-pryntaraŭ, univiersitecki Centr sučasnych kanstrukcyj i kampazitaŭ niadaŭna stvaryŭ pieršy dom, nadrukavany na 3D i zrobleny całkam ź bijamateryjałaŭ.
Pošuk sposabu vytvorčaści damoŭ z dapamohaj 3D-druku ŭ maštabie — heta prablema, jakuju mnohija sprabavali vyrašyć u apošnija hady. Na siońniašni dzień bolšaść rašeńniaŭ uklučała vykarystańnie bietonu abo hliny i tradycyjnyja mietady budaŭnictva, takija jak draŭlany karkas. BioHome3D inšy.
Pratatyp płoščaj 55 kvadratnych mietraŭ maje padłohu, ścieny i dach, nadrukavanyja na 3D-pryntary z ekałahičnych draŭnianych vałoknaŭ i bijałahičnych smoł. Dom taksama možna całkam pierapracavać, i jon nie patrabuje tydniaŭ i miesiacaŭ budoŭli. Paśla 3D-druku čatyroch modulaŭ daśledčyki sabrali BioHome3D za paŭdnia. Zatym adnamu elektryku spatrebiłasia kala dźviuch hadzin, kab padklučyć dom da elektryčnaści.
Stvaralniki miarkujuć, što BioHome3D moža dapamahčy vyrašyć prablemu deficytu žylla ŭ ZŠA za košt skaračeńnia materyjałaŭ i prac, nieabchodnych dla budaŭnictva dastupnych damoŭ. Varta adznačyć, što deficyt žylla ŭ ZŠA ŭźnik jašče da pandemii i źviazany ŭ tym liku z prablemami ŭ łancužkach pastavak u suviazi z pandemijaj. I choć ekśpierty nazyvajuć hetu prablemu bolš palityčnaj, čym technałahičnaj, heta nie značyć, što technałohii nie adyhryvajuć nijakaj roli ŭ palapšeńni žyllovych umoŭ.
Cemient, klučavy inhredyjent bietonu, maje vielizarny vuhlarodny śled. Pa stanie na 2018 hod suśvietnaja vytvorčaść hetaha materyjału skłała kala 8 % hadavych vykidaŭ parnikovych hazaŭ — heta bolšy ŭniosak u zabrudžvańnie, čym było zroblena ŭsioj avijaindustryjaj. Pamianšeńnie abo poŭnaja admova ad patreby ŭ bietonie pry budaŭnictvie damoŭ moža źmianić situacyju ŭ pazityŭny dla navakolnaha asiarodździa bok.
Cichanoŭskaja pra muža: Uvieś jahony śviet pierakuleny22
Kamientary