Biełarus, jaki pastajanna žyvie za miažoj, pryvioz ź ES mašynu i pakinuŭ baćkam. Jaje zabrali i zapatrabavali «poŭnaj razmytnioŭki»
Arciom zavioz ź Jeŭrasajuza ŭ Biełaruś aŭtamabil na jeŭrapiejskich numarach. U jaho pašpart sieryi PP — dla tych, chto pastajanna žyvie za miažoj. Heta značyć, što jon maje prava zavieźci aŭtamabil dla asabistaha karystańnia, nie płaciačy mytaŭ, — u režymie časovaha ŭvozu — i nie pakidać finansavuju harantyju. Arciom tak i zrabiŭ. Ale praź niekatory čas supracoŭniki DAI kanfiskavali mašynu. Jaje zabrali na skład časovaha zachoŭvańnia i ciapier patrabujuć razmytnić. Historyju mužčyny ŭ siabie ŭ instahramie koratka pryvioŭ Kirył Akulenka. Vydańnie Most razabrała hety kiejs.
Nakolki možna mierkavać z pradstaŭlenaha dakumienta, praź niekatory čas paśla ŭjezdu ŭ Biełaruś, u mai 2025 hoda, Arciom vyrašyŭ viarnucca ŭ ES. Ale zrabiŭ jon heta ŭžo biez časova ŭviezienaha aŭtamabila, jaki mužčyna pakinuŭ u baćkoŭ.
Na hrodzienskaj mytni ŭ mužčyny ŭziali tłumačeńnie ab pryčynach takoha ŭčynku. Jaho słovy zapisaŭ supracoŭnik viedamstva i ŭnios adkazy ŭ farmular, jaki Arciom paśla padpisaŭ.
Tak, biełarus rastłumačyŭ, što jedzie na pracu ŭ Litvu, ale ŭ lipieni maje namier viarnucca ŭ JEAES aŭtobusam i tady ž zabiare aŭtamabil dy vyviezie jaho nazad u ES. Jon taksama paviedamiŭ, što dakumienty i klučy ad mašyny jon pakinuŭ u Mahilovie ŭ baćkoŭ. Arciom paznačyŭ ich dakładny adras jak adras znachodžańnia aŭtamabila.
Siarod pytańniaŭ było i takoje: kamu pieradadzieny transpartny srodak? U tłumačeńni, padpisanym biełarusam, havorycca, što «nikomu nie pieradadzieny». Mužčyna, vierahodna, nie źviarnuŭ uvahu na važnaść hetaj detali.
Kali supracoŭniki DAI pryjechali pa adrasie baćkoŭ Arcioma, tyja jakraz źbiralisia vyjazdžać na tym samym aŭtamabili na jeŭrapiejskich numarach. I heta, pa sutnaści, abvierhła infarmacyju, što mašyna nikomu nie pieradavałasia. Paśla hetaha aŭtamabil zabrali na skład časovaha zachoŭvańnia, niahledziačy na toje, što terminy časovaha ŭvozu parušanyja nie byli. Ciapier ad uładalnika patrabujuć «poŭnaj razmytnioŭki».
Što treba ŭličvać?
Hramadzianin Biełarusi z pašpartam sieryi PP u mytnych metach ličycca zamiežnaj asobaj. Kali jon uvozić aŭtamabil na zamiežnych numarach u Biełaruś u režymie časovaha ŭvozu, to moža pieradavać transpartny srodak biez dazvołu mytnych orhanaŭ inšym asobam u dvuch vypadkach: dla praviadzieńnia techničnaha absłuhoŭvańnia, ramontu (za vyklučeńniem kapitalnaha ramontu), zachoŭvańnia; inšaj zamiežnaj asobie.
Fizičnaj asobie — hramadzianinu JEAES aŭtamabil možna pieradavać z dazvołu mytnych orhanaŭ i pry ŭmovie zabieśpiačeńnia (finansavaj harantyi) vypłaty mytnych pošlin i padatkaŭ.
Bieź finansavaha zabieśpiačeńnia, ale z dazvołu mytnaha orhana možna pieradavać aŭtamabil luboj asobie dla vyvazu z krainy ŭ niekatorych vypadkach — kali vyvaz niemahčymy dekłarantam pa pryčynie śmierci, ciažkaj chvaroby abo pa inšaj abjektyŭnaj pryčynie.
Ciapier čytajuć
Stała viadoma, chto lotaŭ na Šry-Łanku razam z Anžalikaj Mielnikavaj i jaje ahientam18
Kamientary