Як бы вы паглядзелі на «Матрыцу», калі б у ролі Нэа быў Уіл Сміт, а ў ролі Марфея — Шон Конэры?
Амаль заўсёды на адну ролю разглядаецца шэраг акцёраў. Нехта не падыходзіць пад бачанне персанажа, нехта не згаджаецца з кантрактам, нехта пакідае адзін праект дзеля іншага. Але аб некаторых страчаных ролях акцёры потым шкадуюць. А некаторых і цяжка ўявіць у якасці прапанаваных ім персанажаў.
Напрыклад, у «Матрыцы» ролю Нэа мог узяць Уіл Сміт, але прамяняў яе на працу з фільмам «Дзікі, дзікі захад».
А Шон Конэры прэтэндаваў як на ролю Марфея, так і на ролю Гэндальфа ва «Уладары пярсцёнкаў».
«Моцны арэшак» меўся стаць працягам «Каманда» з Арнольдам Шварцэнэгерам. Але апошні адмовіўся ад працягу, а фільм трансфармаваўся ў шматсерыйную візітоўку Бруса Уіліса. Але на яго месцы маглі аказацца Сільвестр Сталонэ, Рычард Гір, Мэл Гібсан, Гарысан Форд і нават Барт Рэйнальдс.
У сваю чаргу Сталонэ прэтэндаваў на месца Гарысана Форда ў «Зорных войнах». Таксама Ханам Сола мог стаць Аль Пачына.
Акрамя таго, Сталонэ і Гібсан прэтэндавалі на галоўную ролю ў «Тэрмінатары». Сталонэ ўсё ж стаў Тэрмінатарам, але ў паралельным сусвеце фільма «Апошні кінагерой» — у тым самым, дзе герой Шварцэнэгера не акцёр, а сапраўдны паліцэйскі-супергерой.
Робін Уільямс мог стаць Джокерам у бёртанаўскім «Бэтмэне». Відаць, меланхалічным такім Джокерам.
Біл Мюрэй і Джон Траволта маглі стаць Форэстам Гампам, але роля дасталася Тому Хэнксу.
А ў «Тытаніку» галоўныя ролі маглі дастацца Джэрэмі Сіста і Гвінэт Пэлтроў.
Жалезным чалавекам Тоні Старкам маглі стаць Нікалас Кейдж і Цімаці Оліфант.
А Мішэль Пфайфер магла бы атрымаць «Оскар» Джодзі Фостэр, калі б не палічыла фільм «Маўчанне ягнят» надта жорсткім ды крывавым.
Цяпер чытаюць
Лукашэнка апраўдваецца за ідэю з прыездам 150 тысяч пакістанцаў — гэта, каб «захаваць наш народ»28
Каментары