Пярцоўка патэнцыйнага праціўніка добра разьвязвае язык! :)
Захад здаў Пуціна ўкраінцам :) Піша ў сваім блогу Аляксандар Класкоўскі.
Захад здаў Пуціна ўкраінцам :) Кіеў атрымаў стэнаграму закрытага паседжаньня саміту НАТО ў Бухарэсьце.
Дагэтуль размовы пра тое, што расейскі прэзыдэнт пакрыўдзіў украінцаў, грунтаваліся на вольным пераказе ягоных тэзаў. Масква ўсё адкідала як правакацыйную хлусьню. Стэнаграма сьведчыць, што Ўладзімер Уладзімеравіч усё ж нахамутаў. Бязбожна завысіў долю этнічных расейцаў у суседняй краіне (замест 17% сказаў: 17 мільёнаў!), адвольна трактаваў крымскае пытаньне, зазначыў, што "поўдзень Украіны цалкам, там толькі адны расейцы". Нарэшце, зрабіў шэраг рызыкоўных намёкаў тэрытарыяльнага кшталту…
Рэч ня ў тым, што памочнікі падсунулі ня тыя лічбы ды факты. У гэтым сьпічы прарвалася сапраўднае стаўленьне расейскага істэблішмэнту да ўкраінскай незалежнасьці. Дыпляматычныя рамкі прымушаюць яшчэ падшукваць болей-меней паліткарэктныя фармулёўкі, кшталту: Украіна ёсьць зонаю нашых стратэгічных інтарэсаў. Але калі адбываюцца такія вось эмацыйныя выкіды, як у Пуціна ў Бухарэсьце, то лішні раз пераконваесься, што ў падкорцы маскоўскіх кіраўнікоў трывала сядзіць перакананьне: "Малороссия" ніякая не дзяржава, яе насельнікі — ніякая ня нацыя, і ўся гэтая "самостийность" — толькі гістарычнае непаразуменьне.
Ці трэба даводзіць, што гэтакае стаўленьне яшчэ мацней экстрапалюецца на Беларусь? Тым болей што ў гэтым выпадку і арытмэтыкай этнічнай расейскасьці маніпуляваць няма патрэбы. Само тутэйшае начальства ахвотна прызнае мясцовае насельніцтва складнікам "адзінага народу", або, у лепшым выпадку, "расейцамі са знакам якасьці".
Шэраг нашых аналітыкаў мяркуюць, што рух Украіны ў НАТО выгадны афіцыйнаму Менску. Маўляў, на гэтым тле ў вачох Крамля падвышаецца каштоўнасьць вайскова-стратэгічнага хаўрусу зь Беларусьсю і яе кіраўніцтва атрымлівае шанец выгандляваць працяг прэфэрэнцыяў.
Мне ж падаецца, што абяцаньне "легчы пад танкі НАТО" ўжо дастаткова дэвальваванае. І Масква, бадай, ва ўсё большай ступені будзе кіравацца меркаваньнем "куды ён дзенецца з падводнай лодкі?". Так што зьніжак надта не дадуць, а вось у сваю арбіту яшчэ мацней уцягнуць.
Між тым натаўскі трэнд Украіны ўжо адгукаецца. Пратачыліся зьвесткі, што наша Міністэрства абароны распрацоўвае абмежаваньні для афіцэраў ды іншых службоўцаў, датычных да розных сакрэтаў, у пытаньні выезду на Ўкраіну. Ведама ж, пярцоўка "патэнцыйнага праціўніка" добра разьвязвае языкі! :)
Калі ж цалкам сур'ёзна, то з гледзішча айчыннага кіраўніцтва — вакол Беларусі ўтвараецца падкова "варожага атачэньня". Адзіны адкрыты шлях — на ўсход.
Нават калі не казаць пра радыкальныя сцэнары кшталту аншлюсу, то ўжо сама лёгіка супольнага адказу "натаўскім агрэсарам" пагражае ператварыць Беларусь у нашпігаваны расейскай мілітарысцкай моцай пляцдарм. Вунь ужо і найноўшыя "Іскандэры" Масква абяцае, і С-400. Канешне, генэралы могуць як дзеці радавацца новым цацкам, але надта ж ня хочацца, каб у выніку мы атрымалі на сваёй зямлі гэтакі рымэйк Чырванасьцяжнай Беларускай вайсковай акругі.
Так што рух Кіева ў напрамку НАТО ды Эўразьвязу, пры тым што можа быць сапраўды кан'юнктурна выгадны афіцыйнаму Менску, абвастрае пагрозы беларускаму сувэрэнітэту.
Стала вядома, што за 200 тысяч еўра прапаноўвалі Сяргею Ціханоўскаму «беларускія бізнэсмены»12
Каментары