Нафтагазавая спрэчка Беларусі і Расіі будзе вырашана на працягу бліжэйшых дзесяці дзён. Аб гэтым сёння ў Санкт-Пецярбургу дамовіліся прэзідэнты дзвюх краін Аляксандр Лукашэнка і Уладзімір Пуцін.
— Мы вызначылі схему, пры якой мы захоўваем нашы падыходы і збліжаем нашы пазіцыі па цэнах. Мы знайшлі магчымасць узаемных саступак і дамовіліся аб тым, як будзем працаваць у гэтай сферы не толькі ў гэтым годзе, 2018—2019 гадах, - сказаў па выніках сустрэчы прэзідэнт Расіі Уладзімір Пуцін.
Прэзідэнты таксама пацвердзілі сваё імкненне да ліпеня 2019-га стварыць асноватворныя правілы па стварэнні адзінага рынку электраэнергіі, а да канца гэтага года — па стварэнні адзінага рынку газу. Ён павінен запрацаваць у 2024 годзе.
Акрамя нафты і газу, кіраўнікі дзяржаў абмеркавалі супрацоўніцтва ў прамысловасці, касмічнай сферы і сельскай гаспадарцы. У прыватнасці, Лукашэнка і Пуцін гаварылі пра санкцыі Рассельгаснагляду ў дачыненні да беларускіх вытворцаў прадуктаў харчавання.
— Я папрасіў урад Расійскай Федэрацыі, каб на гэтым тыдні нашы спецыялісты выехалі ў Беларусь і прапрацавалі ўсе пытанні з калегамі на адпаведных прадпрыемствах, у дачыненні да якіх паўсталі нейкія сумневы з пункту гледжання захавання нашых фітасанітарных нормаў, — сказаў расійскі прэзідэнт. — Я думаю, што гэтыя пытанні, якія вырашаюцца ў ходзе практычнай сумеснай працы.
Аляксандр Лукашэнка і Уладзімір Пуцін падчас выніковай заявы некалькі разоў паўтарылі, што «паміж нашымі краінамі не засталося нявырашаных пытанняў».
— Вядома, дрэнна, што прэзідэнтам даводзіцца ўмешвацца ў праблемы не нашага ўзроўню. Але на сёння ў нас не засталося нявырашаных пытанняў. Больш за тое, мы змаглі зазірнуць у будучыню функцыянавання нашых эканомік, — заявіў Аляксандр Лукашэнка.
Кіраўнік дзяржавы падзякаваў Уладзіміру Пуціну за тое, што Расія пайшла на рэфінансаванне крэдытнай запазычанасці Беларусі ў гэтым годзе.
Сустрэча кіраўнікоў дзяржаў у Санкт-Пецярбургу ў фармаце сам-насам працягвалася каля 3,5 гадзін, а потым на працягу паўтары гадзіны працягвалася ў пашыраным фармаце.
Беларусь і Расія дамовіліся аб сумесных дзеяннях у сферы бяспекі, — заявіў Аляксандр Лукашэнка.
Ціханоўскі патлумачыў, чаму ён так паводзіў сябе ў Нью-Ёрку124
Каментары