У расійскіх спартсменаў зноў праблемы з допінгам, адзін залаты медаль Пекіна ў іх могуць забраць
У допінг-пробе расійскай фігурысткі Камілы Валіевай, якая стала чэмпіёнкай Зімовых Алімпійскіх гульняў — 2022 у камандным турніры па фігурным катанні, знайшлі забаронены прэпарат трыметазідзін. Пра гэта паведаміў у сваім тэлеграм-канале намеснік генеральнага прадзюсара канала «Матч ТВ» Васіль Конаў.
Раней партал Inside the Games паведаміў, што допінг-тэст Валіевай стаў прычынай пераносу медальнай цырымоніі каманднага турніру па фігурным катанні Алімпіяды-2022 у Пекіне.
Васіль Конаў лічыць, што гэта драбяза:
«Прэпарат трыметаззідзін не дапамагае спартсмену ніяк. Зусім. Знойдзены ў адной-адзінай пробе ў снежні. І знойдзена мізэр. Ні да, ні пасля ў пробах нічога. Няма ніякага допінгу ў агульнапрынятым разуменні. Няма! Гэты сардэчны прэпарат ніяк не ўплывае на спартыўныя паказчыкі».
Ці будуць падобнай думкі трымацца адказныя за антыдопінгавы кантроль установы, высветліцца неўзабаве.
Каментары