Іранскія дроны здаюцца не вельмі эфектыўнымі на полі бою. Але праблемы ўкраінцам яны ствараюць

Нагадаем, Злучаныя Штаты лічаць, што прымяненне расійскімі сіламі беспілотнікаў, атрыманых ад Ірана, паказала іх «шматлікія няўдачы» на поле бою. Пра гэта на брыфінгу ў пятніцу сказала намесніца намесніка міністра абароны ЗША па палітычных пытаннях Саша Бэйкер. Яна дадала, што іранскія дроны не даюць Расіі тэхналагічнай перавагі ў поўнамаштабнай вайне.

Амерыканскі інстытут вывучэння вайны (ISW) піша, што выкарыстанне Расіяй іранскіх дронаў не дае ёй эфекту, параўнальнага з тым, што аказалі на ход вайны ракетныя ўстаноўкі HIMARS, якія з'явіліся ва ўкраінскай арміі.

Рэгулярна і ўкраінцы паведамляюць, як збіваюць большую частку іранскіх дронаў. Але ў чым жа іх небяспека?

Першая праблема, што яны вельмі танныя, каштуюць усяго дзясяткі тысяч даляраў.

«Іранскія беспілотнікі не такія ўжо і дарагія, улічваючы, што яны ўтрымліваюць камерцыйныя кампаненты. Украінская адзнака Shahed-136 прыкладна ў $20 000 гучыць правільна. Яны могуць быць эфектыўнымі, паколькі могуць быць выкарыстаны і для удараў па ваенных цэлях, а таксама як псіхалагічная зброя, калі атакуюць Адэсу і Белую Царкву, якія знаходзяцца далёка ад лініі баявых дзеянняў», — тлумачыць Forbes Украіна саветнік Цэнтра стратэгіі, палітыкі, планаў і праграм CNA, навуковы супрацоўнік Цэнтра новай амерыканскай бяспекі Сэмюэль Бендэтт.

Па словах аналітыка, яны могуць быць дастаткова дакладнымі. Іх запускаюць у вялікіх колькасцях, каб пераадолець украінскую супрацьпаветраную абарону і прайсці яе — рана ці позна адзін Shahed-136 можа пракрасціся і трапіць у цэль. Гэтая насычанасць робіць танныя і шматлікія дроны такімі небяспечнымі.

Іранскія беспілотнікі нібыта ўжо пачалі збіраць на тэрыторыі Расіі з камплектуючых, якія дастаўляюцца транспартнымі самалётамі з Тэгерана. Са слоў Сэмюэля Бендэтта, Расія можа сама штодня збіраць дроны-камікадзэ.

«Ёсць сцвярджэнне, што некалькі расійскіх прадпрыемстваў могуць вырабляць дзясяткі такіх дронаў штодня. Улічваючы іх нізкі кошт і адносную нескладанасць, цалкам магчыма, што Расія зможа сабраць або вырабіць вялікую колькасць гэтых беспілотнікаў», — кажа дарадца цэнтра стратэгій CNA.

Хаця дроны нашмат таннейшыя, чым крылатыя і балістычныя ракеты, украінскай СПА можа быць стратна і нявыгадна іх збіваць. Украінцы трацяць на танныя дроны дарагія ракеты СПА, якія таксама трэба папаўняць і перазараджваць устаноўкі, а гэты час могуць паляцець больш эфектыўныя крылатыя і балістычныя ракеты.

Расія працягне тэрор насельніцтва ў гарадах далёка ад лініі фронту, выкарыстоўваючы больш танныя і больш масавыя тэхналогіі, чым ракеты коштам мільёны даляраў. Для расіян важная не столькі эфектыўнасць такіх удараў, як сам факт псіхалагічнага і маральнага ціску на насельніцтва Украіны, а таксама перагрузка ўкраінскай супрацьпаветранай абароны.

Ды і не варта забываць, што частка дронаў усё ж далятае да цэлі, што робіць іх вельмі небяспечнай зброяй для тэрору насельніцтва.

• 5
• 0
• 3
• 1
• 0
• 5
• 46
• 0