Паўднёвая Карэя аслабіла санкцыі ў дачыненні да Беларусі. Рашэнне было прынята яшчэ 24 лютага, але папраўкі ў заканадаўства ўступілі ў сілу 28-га.
У прыватнасці, Паўднёвая Карэя дазволіла экспарт медыцынскага абсталявання ў Беларусь і ў Расію. У якасці прыкладу называецца пастаўка рэнтгенаўскіх апаратаў і радыенуклідных прылад візуалізацыі.
Разам з тым сказана, што пад выключэнні трапляе любая медтэхніка, а таксама прызначаныя для яе запчасткі.
Раней для пастаўкі асобных відаў абсталявання, якое трапіла пад санкцыі, неабходна было атрымліваць індывідуальныя дазволы. Цяпер для экспарту патрабуецца толькі папярэдняе паведамленне ўладаў.
Акрамя таго, на працягу 30 дзён пасля ўстаноўкі тэхнікі трэба будзе падаць пацвярджэнне, а затым два разы на год даваць справаздачу пра мэтавае выкарыстанне.
Рашэнне аб адмене абмежаванняў у дачыненні да медабсталявання прынята з улікам «складанасцяў, якія заяўляліся ў апошні час кампаніямі-экспарцёрамі», гаворыцца ў дакуменце.
Каментары