«Рыхтаваўся да выезду, але не паспеў». Былога палітвязня паўторна затрымалі неўзабаве пасля выхаду з калоніі
Атрымала працяг гісторыя Ігара Неміровіча, які восенню 2023 года звяртаўся ў камісію па вяртанні беларусаў, якія з'ехалі з-за рэпрэсій, аднак, верагодна, не дачакаўся яе адказу і затым быў затрыманы і асуджаны ў Беларусі. Як стала вядома «Люстэрку», пасля вызвалення мужчыну зноў затрымалі — гэтым разам праз «садзейнічанне экстрэмісцкай дзейнасці».
Збег, вярнуўся, трапіў за краты
Ігар Неміровіч родам з Брэста, цяпер яму 31 год. Пачатак яго гісторыі расказвалі праваабаронцы «Вясны»: мужчыну затрымалі вясной 2022 года і змясцілі пад хатні арышт, аднак яму ўдалося збегчы і выехаць у Польшчу.
Восенню 2023 года Неміровіч звярнуўся ў камісію па вяртанні беларусаў, якія выехалі з краіны з-за рэпрэсій, і пазней вярнуўся дадому. Гэты момант каментаваў набліжаны да ГУБАЗіК тэлеграм-канал: паводле інфармацыі сілавікоў, заяўку Ігара не паспелі разгледзець, бо ён «адправіў электронны ліст у камісію па вяртанні і паехаў у Беларусь наступнай жа ноччу».
У выніку ў Беларусі мужчыну затрымалі і ў канцы 2023 года проста ў СІЗА судзілі за публікацыю ў інстаграме з тэкстам, які «ў непрыстойнай форме прыніжае гонар і годнасць Аляксандра Лукашэнкі». Суддзя прызнала хлопца вінаватым і прызначыла год калоніі агульнага рэжыму. Зварот у камісію яна не палічыла «безумоўнай падставай для высновы аб ягоным раскаянні».
Паводле інфармацыі «Вясны», Ігар Неміровіч адбываў пакаранне ў калоніі № 17 у Шклове, у жніўні 2024 года вызваліўся.
«Рыхтаваўся да выезду, але не паспеў»
Як стала вядома «Люстэрку», ужо восенню таго самага года мужчыну затрымалі паўторна. Гэтую інфармацыю журналістам пацвердзіў чалавек, які перасякаўся з Неміровічам за кратамі. У мэтах бяспекі некаторыя дэталі яго гісторыі не публікаюцца, аднак пацвярджаецца факт яго зняволення ў мінулым.
«Ігар рыхтаваўся да выезду з Беларусі, але не паспеў і быў затрыманы. Ён сказаў, што пасля выхаду з-за кратаў яму хтосьці падказаў, што можна атрымаць дапамогу як былому палітвязню. Ігар пашукаў аб гэтым у інтэрнэце і абраў «Вясну». Ён мне сказаў, што напісаў у «прыват» да «Вясны». Гаворка ішла пра Telegram», — паведаміў ён.
Суразмоўца «Люстэрка» дакладна не ведае, быў гэта сапраўдны бот ці падроблены. Паводле яго, ён не абмяркоўваў гэты момант з Ігарам. «Мяркую, ён і не правяраў», — выказаў меркаванне ён.
Аднак гэты момант можа быць важны: падробленыя боты зваротнай сувязі ёсць у мноства няўрадавых ініцыятыў, у тым ліку і ў «Вясны». Як пісалася раней, за фэйкавым чат-ботам плана «Перамога» стаялі супрацоўнікі ГУБАЗіК, за ботам Палка Каліноўскага — таксама яны.
«Ён адправіў у перапісцы сваё фота, дзе апроч твару была даведка аб вызваленні з вязніцы. «Вясна», са словаў Ігара, размесціла гэтае фота у сваім інстаграм-акаўнце, што было заўважана сілавікамі. З таго, што я памятаю, Ігар сам бачыў гэтую публікацыю з тым фота, дзе ён стаіць з даведкаю ў руках. Ігар дакладна казаў пра Instagram», — гаворыць суразмоўца.
У праваабарончым цэнтры «Вясна» падкрэслілі, што не публікавалі ніякіх дакументаў Неміровіча.
«Мы не публікуем асабістую інфармацыю палітвязняў, якая можа ім патэнцыйна нашкодзіць», — пракаментавалі «Люстэрку» прадстаўнікі арганізацыі. Там таксама дадалі, што ў мэтах бяспекі не могуць пацвердзіць або абвергнуць, ці звяртаўся да іх той ці іншы чалавек.
Па словах крыніцы «Люстэрка», на Неміровіча завялі новую крымінальную справу, у ёй фігуравала якраз тая адпраўленая фатаграфія. Суразмоўца «Люстэрка» не запомніў артыкул дакладна, аднак выказаў здагадку, што гаворка пра 361-4 КК (садзейнічанне экстрэмісцкай дзейнасці).
Факт паўторнага затрымання Ігара Неміровіча таксама пацвердзіла праваабарончая ініцыятыва Dissident.by са спасылкай на ўласную крыніцу. Паводле інфармацыі праваабаронцаў, суд па справе берасцейца прайшоў у красавіку 2025 года. Па артыкуле 361-4 КК мужчыну прысудзілі да трох гадоў пазбаўлення волі ва ўмовах узмоцненага рэжыму.
Цяпер чытаюць
Пяць пытанняў, якія застаюцца пасля смерці экс-выкладчыка БНТУ Шчукіна, што ўцякаў ад міліцыі5
Каментары