Першы намеснік міністра ўнутраных спраў Юрый Назаранка падчас семінара ў Палаце прадстаўнікоў адзначыў, што МУС прапануе перагледзець падыходы да перавозкі дзяцей у транспартных сродках. Паводле яго слоў, сітуацыя з дзіцячым траўматызмам на дарогах выклікае сур'ёзную занепакоенасць, піша БелТА.
У 2024 годзе кожны чацвёрты загінулы ў ДТЗ кіроўца не карыстаўся рамянём бяспекі ці шлемам. Больш за траціну загінулых пасажыраў таксама не выкарыстоўвалі сродкі пасіўнай бяспекі. За год зафіксавана звыш 150 тысяч выпадкаў, калі рамяні бяспекі не выкарыстоўваліся, каля 25 тысяч з іх — паўторна. Правілы перавозкі дзяцей былі парушаныя 42 тысячы разоў, кожнае дзясятае парушэнне — паўторнае.
З 2019 да 2024 года колькасць ДТЗ з удзелам дзяцей-пасажыраў вырасла са 144 да 204 выпадкаў, а колькасць загінулых дзяцей — з 7 да 14.
Назаранка падкрэсліў, што адна з прычын такой негатыўнай тэндэнцыі — слабая адказнасць за падобныя парушэнні. Папярэджанні не даюць неабходнага выхаваўчага эфекту, а поўны кантроль за перавозкамі дзяцей немагчымы. Аўтаматычныя сістэмы фіксацыі парушэнняў таксама не заўсёды могуць выявіць гэтыя выпадкі.
У сувязі з гэтым МУС прапануе ўнесці парушэнні, звязаныя з невыкарыстаннем рамянёў бяспекі і няправільнай перавозкай дзяцей, у спіс выключэнняў, на якія не будзе распаўсюджвацца мера ў выглядзе папярэджання, а адразу будзе прадугледжана больш строгае пакаранне.
Каментары