2 кастрычніка раніцай Хельсінкскі раённы суд прыняў рашэнне аб арышце былога гульца хакейнай зборнай Фінляндыі і клубаў НХЛ ды КХЛ Ерэ Каралахці. Былы спартсмен, які ў свой час гуляў і ў мінскім «Дынама», падазраецца ў здзяйсненні цяжкага нарказлачынства, нібыта ўчыненага ў Хельсінкі ў перыяд з 1 чэрвеня па 29 верасня 2025 года, піша Yle.
Паліцыя цяпер працягвае следства, а суд абавязаў, каб абвінавачанне па гэтай справе было выстаўлена не пазней як 15 студзеня 2026 года. Паводле звестак выдання Yle, у гэты ж дзень суд разгледзеў пытанні аб арышце і іншых асобаў, якіх падазраюць у нарказлачынствах, аднак невядома, ці звязаныя яны непасрэдна з Каралахці.
Адвакат Каралахці паведаміў, што ягоны падабаронны цалкам адмаўляе абвінавачанні. Падрабязнасці справы застаюцца засакрэчанымі.
Ерэ Каралахці — вядомы ў мінулым хакеіст. У складзе зборнай Фінляндыі ён тройчы заваёўваў срэбра і адзін раз бронзу на чэмпіянатах свету, а таксама быў уключаны ў сімвалічную зборную турніру.
У 2011‑2013 гадах ягоным клубам у Кантынентальнай хакейнай лізе было мінскае «Дынама», і тады ён быў адным з лідараў каманды. Фінскі легіянер адзін час быў нават капітанам «Дынама», а ў 2011 годзе гуляў у матчы ўсіх зорак КХЛ.
Гэта не першы раз, калі Каралахці трапляе ў поле зроку праваахоўнікаў. У 2007 годзе Хельсінкскі апеляцыйны суд прызнаў яго вінаватым у набыцці амфетаміну ў Эстоніі на суму 10 тысяч еўра і ў садзейнічанні цяжкаму нарказлачынству. Тады ён атрымаў 1 год і 8 месяцаў умоўнага тэрміну.
У 2008 годзе яго таксама асудзілі за ўжыванне наркотыкаў. Сам Каралахці прызнаваў, што ў пачатку 2000‑х пакутаваў ад сур’ёзнай залежнасці. У 2017 годзе выйшла кніга пра жыццё хакеіста, дзе падрабязна апісваюцца яго праблемы з наркотыкамі, якія пачаліся яшчэ ў падлеткавым узросце.
Мінгандлю выпадкова зліло дакумент, у якім паказала, як і за што налічвае прэміі11
Каментары
"прынялі" тут - "ніяк"
Рэдакцыя спрабуе паведаміць, што яе захапілі?