Z 1 červienia va Uźbiekistanie ŭvodzicca sproščany paradak atrymańnia dazvołu na žycharstva terminam na piać hadoŭ dla zamiežnych hramadzian i asob biez hramadzianstva. Heta norma zamacavana ŭ ukazie prezidenta ad 18 krasavika, paviedamiła Uźbieckaja słužba Radyjo Svabody sa spasyłkaj na Ministerstva justycyi krainy.
Dla atrymańnia dakumienta zamiežniku nieabchodna ŭnieści 200 tysiač dalaraŭ ZŠA, a taksama pa 100 tysiač dalaraŭ za kožnaha člena siamji — muža abo žonku, dziaciej i baćkoŭ.
Ułady Uźbiekistana raźličvajuć, što prahrama pryciahnie ŭ krainu zamožnych inviestaraŭ, a taksama ŭzmocnić prytok kapitału ŭ ekanomiku. Anałahičnyja «załatyja vizy» ŭžo dziejničajuć u šerahu krain, takich jak Partuhalija, AAE, Kanada, ZŠA i inšyja. Jany dazvalajuć zamiežnikam atrymać DNŽ abo hramadzianstva ŭ abmien na inviestycyi ŭ ekanomiku, nieruchomaść abo nacyjanalnyja prajekty.
Inšyja krainy Centralnaj Azii «załatuju vizu» nie vydajuć, ale ŭ Kazachstanie i Kyrhyzstanie prapanoŭvałasia ŭvieści prahramy atrymańnia VNŽ za inviestycyi.
U vieraśni 2022 hoda ŭ Kazachstanie była prapanavana kancepcyja «inviestycyjnaj vizy» z pravam na 10-hadovy vid na žycharstva za bujnuju inviestycyju ŭ ekanomiku krainy.
U 2023 hodzie Žaharku Kienieš (parłamient) Kyrhyzstana adobryŭ zakonaprajekt ab vydačy «inviestycyjnych viz» terminam ad 5 da 10 hadoŭ zamiežnym hramadzianam, jakija ŭkłali ŭ krainu ad 10 da 20 młn somaŭ (115—230 tysiač dalaraŭ pa ciapierašnim kursie). Aŭtary dakumienta zajavili, što heta dobraja mahčymaść dla pradstaŭnikoŭ inšych krain, jakija žadajuć pačać biźnies u krainie. Ale ekśpierty kazali, što dla pryciahnieńnia inviestycyj uładam u pieršuju čarhu nieabchodna zrabić prazrystaj padatkovuju palityku i harantavać abaronu ŭłasnaści pradprymalnikaŭ.
Kamientary