Унікальная паштоўка з выявай Глыбокага вярнулася ў горад праз сто гадоў ФОТА
Жыхары Глыбокага набылі паштоўку з выявай свайго мястэчка, выдадзеную перад І Сусветнай вайной, і збіраюцца падараваць яе мясцоваму музею.
Незадоўга да Першай сусветнай вайны глыбоцкі гандляр кнігамі Л. Ром (дарэчы, у ягонай краме прадаваліся беларускія кнігі і календары) выдаў серыю каляровых паштовак з выявамі Глыбокага. Каляровая фатаграфія тады была рэдкасцю – рабіліся чорна-белыя здымкі, мастак іх размалёўваў, і толькі потым паштоўку друкавалі.
Каляровыя паштоўкі з выявамі Базарнай плошчы і Докшыцкай вуліцы даўно вядомыя глыбачанам, яны друкаваліся ў некалькіх краязнаўчых выданнях. Паштоўка з выявай Беразвецкага кляштара захоўваецца ў гісторыка-краязнаўчым музеі ў Браславе.
У снежні на аўкцыёне ay.by была выстаўленая паштоўка, якую ніхто ў Глыбокім дасюль не бачыў. На ёй бачныя забудова мястэчка і касцёл Святой Тройцы, якія адлюстроўваюцца ў спакойнай паверхні Кагальнага возера. Паштоўка была адасланая з Глыбокага ў Мінск 2 кастрычніка 1915 года — усяго праз некалькі тыдняў пасля першай – двухтыднёвай – акупацыі мястэчка нямецкімі войскамі.
Прадавец паставіў стартавы кошт 85 даляраў, але пазней зменшыў да 50. Калі краязнаўцы даведаліся пра існаванне паштоўкі, то вырашылі сабраць грошы і набыць. Каардынаваў збор грошай і набываў паштоўку настаўнік і экскурсавод Юрый Калбасіч.
«Калі жыхары Беларусі выкупілі Статут ВКЛ за 45 000 даляраў, то чаму жыхары Глыбокага не могуць выкупіць паштоўку за 85 даляраў? У глыбачанаў хапіла патрыятызму, арганізаванасці і ахвярнасці для такой справы», — кажа Юрый Калбасіч.
На паштоўку ахвяравалі каля пятнаццаці чалавек – грамадскія актывісты, краязнаўцы, ды простыя глыбачане, якія даведаліся пра збор грошай у сацыяльных сетках. 4 студзеня паштоўка была набытая за 52 даляры. Днямі яна будзе перададзена ў гісторыка-этнаграфічны музей.
Цяпер чытаюць
Чаму Беларусбанк рэзка знізіў стаўкі па іпатэцы і як гэта паўплывае на рынак нерухомасці?3
Чаму Беларусбанк рэзка знізіў стаўкі па іпатэцы і як гэта паўплывае на рынак нерухомасці?
«У Віцебску заходзіў у тралейбус і казаў «Слава Украіне!». Украінца ў 67 гадоў пасадзілі за каменты, напісаныя пасля гібелі хроснай дачкі пад абстрэлам у Кіеве1212
Каментары