Кіроўца з сужыцелькай і сябрам дома на праспекце Кляцкова ў Гродне пілі з вечара, паведамляе прэс-служба ДАІ Гродна.
Прачнуўшыся апоўдні, працягнулі. Калі праз пару гадзін скончылася і піва, сужыцелька папрасіла мужчыну ўзяць аўтамабіль і з'ездзіць па гарэлку, і дала яму ключы. Яна ведала і пра пазбаўленне правоў, і пра нецвярозы стан сужыцеля. «Але мы вырашылі рызыкнуць», — сказала потым яна.
Мінак звярнуў увагу на хісткую хаду кіроўцы каля крамы на вуліцы Фамічова і паведаміў пра яго ў ДАІ. Нарад ДПС хутка зарыентаваўся і на скрыжаванні каля гіпермаркета на праспекце Янкі Купалы «Альфа Рамэа» спыніў.
У кіроўцы ўтрыманне алкаголю больш чым у 13 разоў перавысіла гранічна дапушчальнае. Яго ў чарговы раз прыцягнуць да крымінальнай адказнасці. Дастаўленая на штрафстаянку машына сужыцелькі (на яе таксама склалі пратаколы) падлягае канфіскацыі. За свае няпоўныя трыццаць гадоў затрыманы прыцягваўся да адказнасці за кіраванне транспартам у нецвярозым стане 23 разы, у тым ліку 7 — да крымінальнай.
Каментары