Вядучы «Контураў» і аўтар прапагандысцкіх фільмаў пра ЗША пайшоў працаваць на «Голас Амерыкі»
Колішні работнік тэлеканала АНТ Ілля Коласаў у 2015—2017 быў тварам праграмы «Контуры» — ён зачытваў навіны, рабіў інтэрв'ю з чыноўнікамі. Яго паклікалі на АНТ з расійскага тэлеканала RTVI.
Выступы Коласава цалкам укладваліся ў звыклую лінію беларускага тэлебачання і не ўтрымлівалі элементаў дыскусійнасці.
Выгляд Коласава ў кадры не сведчыў пра тое, што навіны АНТ ён зачытвае міма волі ці з псіхалагічным дыскамфортам.
Як выявілася, з такім жа самым выглядам цяпер ён зачытвае навіны ў тэлевыпусках «Голасу Амерыкі».
Там ён усплыў пасля нядоўгай супрацы з прэс-службай Федэрацыі хакея Беларусі.
«Голас Амерыкі» — мяккая ідэалагічная сіла ЗША, пакліканая ідэалізаваць амерыканскі лад жыцця, а таксама крытыкаваць ідэйных ворагаў.
Коласаў працуе там ужо некалькі месяцаў, здымае сюжэты і вядзе са студыі праграму «Тыдзень».
«Існуюць засцярогі адносна стану дэмакратыі і вяршэнства закона, дзеянняў у датыченні апазіцыі, яны павінны быць улічаны ўладамі Беларусі, каб стварыць палітычны падмурак для змены адносін», — дае Коласаў слова амерыканскаму эксперту, які расказвае пра адносіны ЗША з Беларуссю.
У наступным сюжэце ён ужо крытыкуе Расію, у наступным — паведамляе аб падзенні ўзроўню свабоды ў свеце, у наступным — інфармуе пра перспектывы амерыканскай эканомікі ў выпадку, калі прапанаваныя Трампам захады будуць прынятыя.
Асабліва захапляльна гэта глядзіцца, калі ўзгадаць векапомныя фільмы Коласава «Бе$ценный доллар» і «Бе$ценный доллар — 2» пра амерыканскую валюту, якая несправядліва заняволіла свет.
Таксама не паспела забыцца, як Коласаў усхваляў Уга Чавеса: «Проста ён з людзей, якія мне сімпатычныя. Рызыкуючы наклікаць на сябе непрыязнасць людзей, якія б назвалі сябе лібераламі ці дэмакратамі, скажу: асабіста я да Чавеса стаўлюся з пашанай. Таму прывёз сабе з Каракаса бейсболку з профілем венесуэльскага Чэ. Палічыўшы, што ў нас матрыцы каштоўнасцяў супадаюць. Мне гэтаксама сімпатычны Аляксандр Рыгоравіч Лукашэнка», — казаў ён.
Звязацца з Іллёй Коласавым пакуль не ўдалося.
-
У Маскве мужчыны масава спрабуюць знаёміцца, мацаючы дзяўчат за ягадзіцы. Так загадаў рабіць сэкс-коўч з Беларусі
-
З 1 верасня беларусам, што едуць у Латвію, трэба будзе зарэгістравацца на спецыяльным партале і запоўніць анкету
-
Спецслужбы пад выглядам «друку сімволікі і сцягоў» спрабуюць падбіць беларусаў замежжа перадаць свае асабістыя звесткі
У Маскве мужчыны масава спрабуюць знаёміцца, мацаючы дзяўчат за ягадзіцы. Так загадаў рабіць сэкс-коўч з Беларусі8
Каментары