Расія звязала выдзяленне Беларусі вялікага крэдыту з інтэграцыяй. Але Мінск перастрахаваўся
Расія ўвязвае выдзяленне Беларусі дзяржаўнага крэдыту на 630 мільёнаў даляраў з інтэграцыйнымі працэсамі. Але Мінск на гэты год ужо застрахаваў сябе іншымі крыніцамі на выпадак непрадастаўлення расійскага крэдыту. Пра гэта заявіў журналістам міністр фінансаў Беларусі Максім Ермаловіч, піша Tut.by.
У красавіку ўрад Расіі ўзгадніў выдзяленне Мінску дзяржкрэдыту на 600 млн даляраў для рэфінансавання бягучай знешняй запазычанасці Беларусі па раней прыцягнутых у Расіі крэдытах.
«Міністр фінансаў Сілуанаў неаднаразова казаў, што калі мы выйдзем на агульны механізм інтэграцыі, то будзем вырашаць пытанне крэдытнага ўзаемадзеяння ў больш шырокім фармаце, а не толькі ў рамках гэтага крэдыту [на 630 млн даляраў], але ў цэлым па ўсім графіку плацяжоў на карысць Расіі», — сказаў Ермаловіч.
Ён адзначыў, што яшчэ ў мінулым годзе беларускія ўлады разумелі, што «крэдыт увязаны з вялікім парадкам дня двухбаковых адносін і рыхтаваліся замясціць яго іншымі крыніцамі». У выніку было падпісана рамачнае пагадненне з Банкам развіцця Кітая і перагледжаны планы па выхадзе на ўнутраны рынак дзяржаблігацый, намінаваных у замежнай валюце.
Урад Беларусі да канца года думае прыцягнуць ад Банка развіцця Кітая крэдыт на 3,5 млрд юаняў, што эквівалентна 500 млн далярам. Што тычыцца дадатковых выпускаў аблігацый Мінфіна ў замежнай валюце, то пры плане ў 370 млн даляраў ужо прыцягнута 500 млн даляраў, сказаў Ермаловіч.
Міністр фінансаў дапусціў, што калі вырашыцца комплексная сітуацыя з інтэграцыяй і Беларусь прыцягне 630 млн даляраў у выглядзе расійскага крэдыту, то рэсурсы пойдуць на пагашэнне абавязацельстваў наступнага года. «Гэты год забяспечаны крыніцамі ў поўным аб'ёме», - сказаў Ермаловіч.
У цяперашні час расійскі крэдыт мае для Беларусі вялікую прывабнасць, чым суверэнныя еўрааблігацыі. Таму ў Мінску дапускаюць карэкціроўку планаў па размяшчэнні еўрабондаў ў 2020 годзе.
Максім Ермаловіч выказаў упэўненасць, што ў сярэднетэрміновай перспектыве Беларусь зможа выходзіць на міжнародныя рынкі капіталу на такіх жа ўмовах, як і Расія.
Цяпер чытаюць
Расійскія і лукашэнкаўскія спецслужбы на фоне залёту дронаў у Польшчу правялі інфаатаку. Яе зладжанасць дае падставы думаць, што залёт быў спланаваны1515
Каментары