26 чэрвеня ў Гродне адбудзецца сустрэча прэм’ер‑міністраў Беларусі і Літвы Сяргея Сідорскага і Андруса Кубілюса.
26 чэрвеня ў Гродне адбудзецца сустрэча прэм’ер‑міністраў Беларусі і Літвы Сяргея Сідорскага і Андруса Кубілюса.
Пра гэта паведаміў журналістам намеснік міністра замежных спраў Беларусі Валерый Варанецкі ў Мінску 19 чэрвеня па выніках беларуска‑літоўскіх кансультацый паміж замежнапалітычнымі ведамствамі.
Паводле слоў Варанецкага, падчас сустрэчы прэм’ер‑міністраў плануецца парафіраваць дагавор аб рэжыме мяжы і падпісаць пагадненне аб парадку перасячэння мяжы жыхарамі памежных рэгіёнаў.
Акрамя таго, паведаміў Варанецкі, прэм’ер‑міністры плануюць абмеркаваць пытанні падрыхтоўкі міжнароднага беларуска‑літоўскага эканамічнага форуму, што пройдзе 16—19 верасня ў Вільнюсе. «У ім будуць удзельнічаць прадпрыемствы з усяго балтыйскага рэгіёну. Ён зможа надаць вельмі сур’ёзны імпульс гандлёва‑эканамічнаму супрацоўніцтву не толькі Беларусі і Літвы, але і Беларусі з усімі краінамі балтыйскага рэгіёну», — сказаў намеснік міністра.
У сваю чаргу, намеснік кіраўніка знешнепалітычнага ведамства Літвы Эвалдас Ігнатавічус зазначыў, што прэм’ер‑міністры маюць намер абмеркаваць эканамічнае супрацоўніцтва, транспартныя пытанні, выкарыстанне Клайпедскага порта і ўзаемадзеянне ў сферы энергетыкі. «Пытанні энергетыкі для нас вельмі важныя ў кантэксце закрыцця Ігналінскай АЭС і планаў будаўніцтва атамных станцый у Літве і Беларусі», — заявіў намеснік кіраўніка літоўскага МЗС.
Ігнатавічус падкрэсліў, што Літва выступае за далейшыя захады ў лібералізацыі візавага рэжыму паміж Беларуссю і ЕС. «Літва мае намер ініцыяваць крокі па паніжэнні кошту шэнгенскіх віз для Беларусі», — сказаў ён.
Намеснік міністра таксама зазначыў, што «Літва і Беларусь маюць намер больш актыўна ўзаемадзейнічаць для рэалізацыі праектаў у рамках ініцыятывы ЕС «Усходняе партнёрства».
Цяпер чытаюць
Беларуска арганізавала адпачынак для дзяцей палітвязняў на Лазурным беразе. Яна расказала, як уцякала з краіны і як яе затрымліваў Інтэрпал5
Каментары