Некалькі маладых людзей падалі ў суд адразу на 32 краіны. Што адбываецца?
Партугальцы ўзростам ад 11 да 24 гадоў падалі іск у Еўрапейскі суд па правах чалавека супраць еўрапейскіх краін, абвінавачваючы іх у няздольнасці справіцца з кліматычным крызісам, выкліканым дзейнасцю чалавека. Пра гэта паведамілі Euronews і іншыя буйныя заходнія СМІ.
Маладыя людзі абвінавачваюць кіраўніцтва 32 еўрапейскіх краін у няздольнасці адэкватна вырашыць праблемы, звязаныя з глабальным пацяпленнем. Яны сцвярджаюць, што ігнараванне краінамі кліматычнага крызісу парушае іх права на жыццё.
Працэс сапраўды гістарычны, бо гэта першы выпадак, калі столькім краінам давядзецца абараняцца ў судзе, ды яшчэ і такога высокага ўзроўню, як Еўрапейскі суд па правах чалавека (ЕСПЧ).
Сярод «абвінавачваных» — усе 27 краін Еўразвяза, а таксама Нарвегія, Турцыя, Вялікабрытанія і нават Расія.
«Стаўкі высокія: перамога некалькіх экаактывістаў у судзе можа юрыдычна вымусіць краіны перагледзець сваю кліматычную палітыку і значна скараціць выкіды, што выклікаюць глабальнае пацяпленне на планеце», — паведамляе Euronews.
Euronews цытуе аднаго з ініцыятараў пазову —пятнаццацігадовага партугальца Андрэ Сантуша Алівэйра: «У Партугаліі мы ўсе сутыкаемся з хвалямі спякоты і засухі, якія ў некаторых выпадках могуць аказацца фатальнымі. Гэта спякота пагражае нашаму праву на жыццё і, што таксама вельмі важна, праву на прыватнае жыццё».
Маладыя людзі сцвярджаюць, што хоць яны і жывуць на перадавой кліматычнага крызісу (Партугалія штогод сутыкаецца з рэкорднай спякотай, ляснымі пажарамі і іншымі праблемамі), але глабальнае пацяпленне не ведае межаў. Па іх словах, калі нічога не памяняецца, тая ж Партугалія сутыкнецца са спякотай 40°C, якая будзе доўжыцца месяц і нават больш.
«Актывісты кажуць, што кіраўніцтва краін парушае не толькі іх права на жыццё, але і права на свабоду ад катаванняў і бесчалавечнага ці прыніжаючага годнасць стаўлення. Калі яны здолеюць усё даказаць, то гэта будзе першы раз у гісторыі, калі ў судзе прызнаюць парушэнне менавіта гэтых правоў ў справе, датычнай экалогіі і кліматычных зменаў», — адзначае Euronews.
Абвінавачаныя краіны, у сваю чаргу, заявілі, што маладыя людзі не падалі дастаткова доказаў сувязі паміж іх кліматычнай палітыкай і шкодай, якую тыя атрымалі. Акрамя таго, урады кажуць, што не былі прадстаўленыя і доказы таго, што дзеянні іх краін нанеслі шкоду фізічнаму і псіхічнаму здароўю людзей. Краіны сцвярджаюць, што не нясуць адказнасць за абарону правоў чалавека за межамі сваёй юрысдыкцыі.
На вынясенне прысуду можа спатрэбіцца да 18 месяцаў. Група актывістаў, якім дапамагае Global Legal Action Network (арганізацыя, якая змагаецца з парушэннямі правоў чалавека), не патрабуе ад дзяржаў грашовай кампенсацыі, але настойвае на зменах у палітыцы ў сферы экалогіі.
Цяпер чытаюць
Уводзяць адказнасць за прапаганду гомасэксуальнасці, бяздзетнасці, а таксама за незаконнае прадстаўленне Беларусі на міжнароднай арэне9
Каментары
Вельмі ўжо любяць яны разам з антываксерамі, трампістамі, рускамірцамі, лукашыстамі і іншым смеццем выказацца па даннай тэме у перапынках паміж смактаннем струкоў:)