Супрацоўнікам ДАІ давялося ратаваць маленькае дзіця, якое больш чым на гадзіну засталося адно ў зачыненым аўтамабілі на марозе ў Полацку, паведамілі ва ўпраўленні ДАІ Віцебскага аблвыканкама.
Паводле звестак сілавікоў, экіпаж ДАІ атрымаў інфармацыю, што паблізу полацкага Спаса-Еўфрасіннеўскага манастыра ў зачыненай машыне Renault плача паўтарагадовае дзіця.
«Прыбыўшы на месца, супрацоўнікі ДАІ высветлілі ў відавочцаў, што дзіця знаходзіцца ў аўтамабілі адно ўжо больш за гадзіну. Тэмпература паветра на вуліцы дасягала мінус 10 градусаў», — сказалі ва ўпраўленні.
Там таксама ўдакладнілі, што інспектары здолелі адкрыць дзверы аўто, дасталі малое і аднеслі яго ў службовую машыну.
Бацькі хлопчыка вярнуліся пазней. Яны заявілі, што дзіця было цёпла апранутае і ў салоне заснула, а яны адлучаліся ненадоўга. Цяпер інспекцыя па справах непаўналетніх праводзіць па гэтай справе праверку.
Каментары