У Барысаве спрабавалі прадаць з аўкцыёну старыя дрэвы без зямлі
На сайце Цэнтра прамысловай ацэнкі ў раздзеле «Аўкцыёны» выданне «Смартпрэс» заўважыла незвычайныя лоты — два «камплекты» дрэў вялікага ўзросту, якія растуць у Барысаве па адрасе вуліца вуліца Марозава, 87.
Першы лот — 78 раслін — ацэнены ў 28 170 рублёў са старту таргоў. У яго ўвайшлі драбналістыя ліпы, бальзамічныя таполі, павіслыя бярозы, два ясені, адна яблыня, адна белая вярба, а таксама кусты пузыраплодніка каліналіснага і снежнаягадніка белага.
Другі складаецца з сямі насаджэнняў: шасці ліп і пузыраплодніка. Ягоны стартавы кошт склаў 4 563 рублі.
Пры гэтым на абодва лоты цана ўжо зніжаная на 10% ад першапачатковай.
Цікава, што прадаюцца толькі самі расліны, а не тэрыторыя, на якой яны растуць. Што рабіць з такой пакупкай, незразумела.
Новаму ўласніку, калі б такі знайшоўся, давядзецца несці адказнасць за гэты зялёны куток (у тым ліку, калі нейкае дрэва абрынецца з-за ветру або па іншых прычынах), і не факт, што гэтыя насаджэнні атрымаецца ссекчы на дровы або паспрабаваць зрабіць з іх піламатэрыялы. Бо па законе «Аб раслінным свеце», калі дрэвы і кусты растуць па-за межамі прыватных падворкаў або аб'ектаў, якія належаць прадпрыемствам і арганізацыям, іх высечка без адпаведных дакументаў на дазвол забароненая.
На аўкцыён расліны трапілі як маёмасць прадпрыемства-банкрута. Там жа апынуліся і некаторыя пабудовы таго ж уласніка па тым жа адрасе, напрыклад, воданапорная вежа і падземныя складскія памяшканні.
Сам аўкцыён ужо завяршыўся, ахвотных пазмагацца за аб'екты расліннага свету не знайшлося. Аднак, як адзначана на сайце, прадавец можа выставіць лот на паўторныя таргі.
Каментары