Čarhovy vypusk «Kłuba redaktaraŭ» na telekanale «Biełaruś—1» byŭ u tym liku pryśviečany materyjałam na sajcie «Našaj Nivy».
«Našaj dziaržavie kankretna abjaŭlena infarmacyjnaja vajna. Niadaŭna ažyćciaŭlałasia ataka na milicyi, paśla na členaŭ urada, a ciapier na žurnalistaŭ, pierajšli na asoby. Heta nie krytyka, a mienavita ataka, — pačaŭ svoj manałoh staršynia Biełteleradyjokampanii Hienadź Davydźka. — Na sajcie «Našaj Nivy» apublikavanaja natatka, dzie niechta niezadavoleny niejkim siužetam i panosić viadučych u sacyjalnych sietkach. Aproč typovaha ŭ takich vypadkach vału abrazaŭ, mnie padałosia dziŭnym, što imiony «aburanaj hramadskaści» byli zamazanyja. Stali hladzieć, kamu heta čorna-biełaja hazieta — u sensie, biez paŭtonaŭ, — daje słova na svaim sajcie. Voś partfolia adnaho z aburanych — lubavańnie fašystami, esesaŭskaja forma, svastyka, nacysckaje vitańnie, sełfi sa zbrojaj, z dvajnikom Hitlera. Słovam, voś chto adlustroŭvaje «aburanuju hramadskaść». Čamu ich imiony zamazali?»
Redaktar «Sovietskoj Biełoruśsii» Pavieł Jakubovič adkazaŭ Davydźku, što, na jaho dumku, u hramadstvie pavinny być šmat mierkavańniaŭ. Jon suprać taho, kab zatykać rty i ličyć častku presy sumlennaj, a častku niesumlennaj.
Jakubovič nahadaŭ, što zaklikaje redaktaraŭ niedziaržaŭnych ŚMI da ŭdziełu ŭ telepieradačy. Na što Davydźka zajaviŭ, što «zaprašali, jany admaŭlajucca». Adznačym, što nikoha z Redakcyi «Našaj Nivy» ŭ efir nikoli nie zaprašali.
Davydźka zapeŭniŭ, što čakaje, pakul da jaho dojdzie list, dasłany redaktarami niedziaržaŭnych ŚMI. «My pačniom supracoŭničać, tolki nie pierachodziačy na asoby, — paabiacaŭ jon i praciahnuŭ. — Insinuacyi, abrazy, zavujaliravanyja i jaŭnyja zakliki da pratestaŭ, a na forumach navat da pahromaŭ — heta praktyčnaja sutnaść usich antydziaržaŭnych ŚMI. Jany pracujuć na razvał dziaržavy», — hrymieŭ Davydźka.
Kamientary