Pa prośbach vieteranaŭ i kamunistaŭ kala MTZ pastaviać pomnik Leninu
Da hadaviny Kastryčnickaj revalucyi kala MTZ pastaviać pomnik Leninu. Z takoj prośbaj da kiraŭnictva pradpryjemstva źviarnulisia «vieterany i kamunisty». Raniej pomnik znachodziŭsia va ŭnutranym dvary zavoda.
Apošni miesiac pomnik restaŭrujecca. Da 7 listapada jaho ŭstalujuć na terytoryi skviera, pobač z MTZ-2, tam, dzie jon stajaŭ u savieckija hady.
«Pomnik časta pierafarboŭvali: to ŭ šery, to ŭ zialony, i ciapier my jaho čyścim, robim novy pastamient», — raspavioŭ Andrej Suślenka, namieśnik hiendyrektara AAT «MTZ» pa ideałohii, kadrach i sacraźvićci.
Jon udakładniŭ, što kiraŭnictva zavoda pryniało rašeńnie vystavić pomnik za terytoryju zavoda paśla zvarotaŭ «vieteranaŭ i kamunistaŭ».
«Nam kazali, što chutka śviata, ale niama kudy kvietki adnosić. Paśla abmierkavańnia my vyrašyli ŭstalavać pomnik na pieršapačatkovym miescy. Ciapier luby hramadzianin moža jaho ŭbačyć, a nie tolki rabočyja», — dadaŭ Suślenka.
Pomnik Leninu kala MTZ budzie adkryty a 13-j hadzinie 7 listapada padčas śviata, jakoje arhanizuje zavod.
Zavadskaja hazieta «Biełarus-MTZ» praviała apytańnie siarod rabočych pra staŭleńnie da pomnika. Nieviadoma, ci byli krytyčnyja kamientary, ale ŭ druk jany nie patrapili.
«Pomnik — heta pamiać pra byłyja časy, pra historyju zavoda i našu maładość. Jaho prosta niemahčyma adsiul prybrać, bo razam z tym my źniščym našu historyju», — ličyć Natalla z adździeła hałoŭnaha mietrołaha.
«Ludzi starejšaha pakaleńnia ŭsio žyćcio pražyli z hetym imiem pačynajučy sa školnaj łavy, Lenin byŭ dla nas simvałam budučyni, my spadziavalisia na lepšaje», — pryvodzić hazieta słovy Anatola z ramontna-miechaničnaha cecha.
«Pomnik vyklikaje tolki stanoŭčyja emocyi, chaj staić jašče šmat hadoŭ», — skazaŭ žurnalistu Siarhiej Uładzimiravič, viadučy inžynier-elektronik.
Na vajnie va Ukrainie zahinuŭ były dyrektar dvuch aršanskich zavodaŭ4
Kamientary