Łukašenka: Refierendum pa Kanstytucyi projdzie nie paźniej za luty 2022 hoda
Pra heta Alaksandr Łukašenka zajaviŭ siońnia, bieručy ŭdzieł u pašyranym pasiadžeńni Kanstytucyjnaj kamisii, piša BiełTA.
«Važna, kab usia rabota, jakaja pravodzicca pa kanstytucyjnym budaŭnictvie, stała asnovaj dla kansalidacyi biełaruskaha hramadstva, zakłała tryvały pravavy fundamient dla raźvićcia krainy na pierśpiektyvu. Upeŭnieny, tak i budzie, bo kančatkovaje rašeńnie prymie narod. Jak ja ŭžo kazaŭ, refierendum adbudziecca nie paźniej za luty nastupnaha hoda», — skazaŭ jon.
Łukašenka na naradzie taksama spyniŭsia na sprečnych momantach.
«Ja nie znajšoŭ pierachodnych pałažeńniaŭ, jakija dajuć adkazy na pytańni, jak buduć dziejničać orhany ŭłady paśla pryniaćcia Kanstytucyi, jak budzie farmavacca Usiebiełaruski narodny schod, jak budzie pracavać upaŭnavažany pa pravach čałavieka. U prajekcie nie praduhledžany dekrety. U takim vypadku što budzie z užo vydadzienymi? Niama adkazu, jakim budzie miechanizm praviadzieńnia vybaraŭ u adziny dzień hałasavańnia pry daterminovym rospusku pałat parłamienta», — zajaviŭ jon.
Łukašenka dadaŭ, što nazvaŭ nie ŭsie prablemnyja pytańni, ich značna bolš. «Adnym słovam, nam jość što abmierkavać. My pavinny bieražliva i racyjanalna pastavicca da prapanoŭ, jakija z tych abo inšych pryčyn nie ŭličany ŭ padrychtavanym prajekcie Kanstytucyi. Akramia taho, pierakanany, što pastupiać prapanovy i ŭ chodzie ŭsienarodnaha abmierkavańnia», — skazaŭ jon.
Pa słovach Łukašenki, abnoŭlenaja kanstytucyja pavinna ŭličvać niuansy, kab nie dapuścić apanientaŭ da ŭłady
«My paśla minułaha hoda razumiejem, što ich dapuścić da ŭłady nielha. Tamu što heta nie tolki nas likvidujuć. Ładna b nas… źniščać krainu! Tamu kanstytucyja novaja pavinna ŭličvać hetyja niuansy. I heta bolš budzie tyčycca orhanaŭ ułady, ich paŭnamoctvaŭ, funkcyj».
Taksama Łukašenka padkreśliŭ, što pry źmianieńni kanstytucyi treba adkazvać na dva asnoŭnyja pytańni: navošta heta robicca i kamu heta treba. Pry hetym adkazu na pytańnie, što hetaha nie treba rabić, być nie pavinna.
Ciapier čytajuć
Kamientary