U Litvie zatrymali piać nielehalnych mihrantaŭ, jakija trapili ŭ ES ź Biełarusi
Pamiežnaja słužba Litvy paviedamiła pra zatrymańnie piaci zamiežnikaŭ, jakija niezakonna pryjechali na terytoryju krainy praź biełaruska-łatvijskuju miažu. Usie jany byli biez dakumientaŭ.
Padčas pravierki aŭtamabila ź litoŭskimi numarami, što spyniŭsia kala zapraŭki ŭ Maryjampalskim rajonie, supracoŭniki pamiežnaj słužby vyjavili kiroŭcu — miascovaha žychara — i piać zamiežnikaŭ, jaho pasažyraŭ, siarod jakich była adna žančyna.
Papiarednie, dvoje ź ich — hramadzianie Jehipta, a troje — hramadzianie Samali, uzrostam ad 20 da 26 hadoŭ.
Litoŭskija pamiežniki pišuć, što hetyja ludzi nielehalna pierasiekli miažu Łatvii z terytoryi Biełarusi i nakiroŭvalisia ŭ krainy Zachodniaj Jeŭropy.
Suprać kiroŭcy raspačata dasudovaje rasśledavańnie pa fakcie niezakonnaha pieravozu ludziej praź dziaržaŭnuju miažu.
Zatrymanych mihrantaŭ viernuć łatvijskim pamiežnikam.
Za pieršaje paŭhodździe 2025 hoda patok mihrantaŭ na miežach ES značna vyras. Za hety čas było zatrymana 352 mihranty, jakija niezakonna pierasiekli miažu Łatvii z boku Biełarusi i sprabavali prajści dalej praź Litvu i Polšču — pieravažna ŭ Niamieččynu. Heta ŭ 2,5 razu bolš, čym za anałahičny pieryjad minułaha hoda (140 čałaviek). Ź ich 157 čałaviek zatrymali litoŭskija pamiežniki, 195 — polskija.
Pavodle litoŭskich uładaŭ, za pieršyja šeść miesiacaŭ hoda zatrymana 31 asoba za nielehalny pravoz mihrantaŭ. Bolšaść ź ich — hramadzianie Ukrainy, Łatvii, Litvy i Małdovy.
U toj ža čas Łatvija taksama praciahvaje sutykacca z surjoznym ciskam nielehalnaj mihracyi z boku Biełarusi. Sioleta łatvijskija pamiežniki zatrymali albo prymusili viarnucca ŭ Biełaruś 5999 čałaviek — amal u 6,7 razu bolš, čym u Litvie (890 čałaviek). U Polščy ž kolkaść sprob niezakonnaha ŭjezdu ź Biełarusi skłała zvyš 15 tysiač.
Na vajnie va Ukrainie zahinuŭ były dyrektar dvuch aršanskich zavodaŭ4
Kamientary