Eks-karala chip-chopa P. Diddy apraŭdali pa abvinavačvańni ŭ handli ludźmi. Ale jamu ŭsio adno pahražaje 20 hadoŭ turmy

Repier i pradziusar Šon Kombs, viadomy jak P. Diddy, byŭ apraŭdany prysiažnymi pa abvinavačańniach u zmovie z metaj rekietu i handli ludźmi. Ale pry hetym jaho pryznali vinavatym pa dvuch mienš ciažkich abvinavačańniach.

Vierdykt prysiažnych, ahučany na treci dzień pasiadžeńniaŭ, pryznaŭ 55-hadovaha Kombsa nievinavatym pa adnym punkcie abvinavačańnia ŭ zmovie z metaj rekietu i dvuch punktach handlu ludźmi z prymianieńniem siły, padmanu ci prymusu, piša NBC.

Adnak prysiažnyja pryznali repiera vinavatym pa dvuch epizodach pieramiaščeńnia z metaj uciahvańnia ŭ prastytucyju. Prakuratury ŭdałosia dakazać, što Kombs pieravoziŭ dziaŭčat u miesca, dzie jany akazvali seksualnyja pasłuhi za ŭznaharodžańnie. Pa kožnym z hetych artykułaŭ jamu pahražaje da dziesiaci hadoŭ turmy. Ale heta byli samyja lohkija abvinavačańni, vystaŭlenyja repieru.

Taki vynik sudovaha pracesu razhladajecca jak pieramoha Kombsa. Pa abvinavačańniach u rekiecie jamu pahražała pažyćciovaje źniavoleńnie, ale prakuroru nie ŭdałosia pierakanać prysiažnych u vinavataści byłoha karala chip-chopa.

Šon Džon Kombs, viadomy pad takimi sceničnymi psieŭdanimami, jak Puff Daddy, P. Diddy, Diddy, źjaŭlajecca nie tolki vykanaŭcam i aŭtaram piesień, ale i muzyčnym pradziusaram. Svaju karjeru jon pačaŭ u 1990-ch hadach i staŭ viadomym jak trochrazovy łaŭreat premii «Hremi». Jak samy paśpiachovy rep-pradziusar Kombs zaniesieny ŭ Knihu rekordaŭ Hiniesa. U 2022 hodzie Forbes acaniŭ jahony majomasny stan u adzin miljard dołaraŭ.

Praces nad Kombsam išoŭ siem tydniaŭ u Ńju-Jorku i vyklikaŭ vialiki rezanans. Abvinavačańnie dakazvała, što zasnavalnik łejbła Bad Boy Records vykarystoŭvaŭ svaju ŭładu, bahaćcie i ŭpłyŭ jak kiraŭnik «złačynnaha pradpryjemstva» dla seksualnaha hvałtu i ekspłuatacyi žančyn na praciahu dvuch dziesiacihodździaŭ.

Na pracesie vystupili amal try dziasiatki śviedak abvinavačańnia — ad byłych asabistych pamočnikaŭ i stylistaŭ da artystaŭ łejbła. Niekatoryja davali pakazańni suprać Kombsa dobraachvotna, inšyja atrymali imunitet u abmien na supracoŭnictva sa śledstvam.

Try žančyny, uklučajučy byłuju dziaŭčynu Kombsa, śpiavačku Cassie, stali centralnymi fihurami spravy, daŭšy padrabiaznyja i adkrytyja pakazańni pra seksualny hvałt, paboi i pahrozy.

Žančyny raskazali pra tak zvanyja viečarynki freak offs, na jakija zaprašali šmatlikich znakamitaściaŭ, i «nočy ŭ hatelach». Na viečarynkach žančyn, uklučajučy tahačasnych dziaŭčat Kombsa, prymušali da seksu z mužčynami z eskortu pad uździejańniem narkotykaŭ. Kombs nibyta rehularna manipulavaŭ imi, prymušajučy ŭdzielničać, pahražajučy tym, što zapisy hetych intymnych sustreč mohuć być pieradadzienyja inšym ludziam.

Abarona Kombsa śćviardžała, što sprava suprać jaho «mocna pierabolšanaja», i jon akazaŭsia na łavie padsudnych tolki z-za svajho ładu žyćcia «śvinhiera» — z elemientami hvałtu, narkotykami i dziciačym alejem. Ale, pa ich słovach, usio adbyvałasia pa ŭzajemnaj zhodzie. 

Advakat padčas pracesu nie admaŭlaŭ, što Kombs časam biŭ svaich dziaŭčat z reŭnaści, ale jon śćviardžaŭ, što žančyny, urešcie, sami zastavalisia z repieram, a členy jahonaha atačeńnia mieli poŭnuju svabodu pajści tady, kali im zachočacca.

Paśla ahałošvańnia vierdyktu advakat zapatrabavaŭ vypuścić P. Diddy pad zakład u miljon dołaraŭ. U chutkim časie sudździa pavinien vyznačyć pakarańnie dla repiera. Abvinavačańnie maje namier damahacca maksimalnaha terminu ŭ 20 hadoŭ — pa 10 hadoŭ pa kožnym punkcie.

• 0
• 0
• 0
• 2
• 0
• 0
• 2
• 0