Літва і Беларусь маюць гарачую лінію для папярэджання пра расійскія беспілотнікі
«Ва ўсіх гэтых інцыдэнтах Расія імкнецца праверыць краіны NATO на ўсходнім флангу», — лічыць намеснік міністра абароны Літвы Томас Гадляўскас.
Намеснік міністра абароны Літвы Томас Гадляўскас паведаміў пра наяўнасць гарачай лініі з Беларуссю для папярэджання пра расійскія беспілотнікі. Пра гэта ён заявіў у інтэрв’ю Die Welt, кажучы пра інцыдэнты з парушэннямі паветранай прасторы ў еўрапейскіх краінах.
«Ва ўсіх гэтых інцыдэнтах Расія імкнецца праверыць краіны NATO на ўсходнім флангу», — лічыць Гадляўскас.
Па яго словах, Масква хоча ведаць, наколькі згуртаваны альянс і якімі метадамі ён рэагуе на такія правакацыі. Адной з рэакцый на гэта з’яўляюцца кансультацыі ў адпаведнасці з артыкулам 4 Дамовы аб NATO, якая прымяняецца, калі дзяржава-член лічыць, што яе недатыкальнасць, палітычная незалежнасць ці бяспека знаходзяцца пад пагрозай.
«Зараз вядуцца дыскусіі пра тое, як мы можам умацаваць усходняе крыло. Асабліва краіны, што мяжуюць з Расіяй або Беларуссю, вельмі сур’ёзна ставяцца да пагрозаў у агульнай паветранай прасторы», — падкрэсліў ён.
У цяперашні час вывучаюцца спосабы адэкватнага рэагавання на такія правакацыі. Так, у Літве цяпер будзе дазволена збіваць дроны ў мірны час.
«Для нас у рэгіёне пагроза з боку Расіі не з’яўляецца нечым новым. Масква не хоча весці перамовы і цяпер узмацняе ціск з дапамогай кібератак, дыверсій на крытычна важных аб’ектах інфраструктуры, перашкод GPS і дэзінфармацыі. Аднак гэта ўзмацняе наша ўсведамленне таго, што мы павінны рабіць больш і знайсці правільныя інструменты для процідзеяння такім атакам», — заявіў намеснік міністра.
Гадляўскас кажа, што заходнія краіны павінны падрыхтавацца да змененага сцэнара пагрозаў: «20 гадоў таму амаль ніхто не думаў пра звычайную (канвенцыйную) вайну, хутчэй пра тэрарыстычныя акцыі».
Цяпер чытаюць
Фоты з Масквы даюць пабачыць Пуціна і Лукашэнку без грыму7
Каментары
сёння на Белсаце ў перадачы Карані Праблемаў сказала, што на дроны, якія ляцяць на краіны Еўропы праз Беларусь, Еўропе трэба адказваць ударамі па тэрыторыі Беларусі і трэба знішчыць усё беларускае войска.
А хто тады будзе папярэджваць па гарачай лініі Літву і іншыя краіны NATO на ўсходнім флангу пра расійскія беспілотнікі? Калі не будзе ні беларускага войска, ні беларускага ПВО?