Сёння да лідэра Аб’яднанай грамадзянскай партыі Анатоля Лябедзькі могуць прыйсці судовыя выканаўцы, каб апісаць хатнюю маёмасць палітыка.
Сёння да лідэра Аб’яднанай грамадзянскай партыі Анатоля Лябедзькі могуць прыйсці судовыя выканаўцы, каб апісаць хатнюю маёмасць палітыка.
Анатоль Лябедзька жыве на вуліцы Лесі Ўкраінкі — гэта ў менскім мікрараёне «Вяснянка». Звычайная трохпакаёўка ў панельным доме, звычайная карпусная мэбля, тэлевізар, лядоўня.
Сёння у кватэру Лябедзькаў могуць пазваніць старэйшы судовы выканаўца Яўфіменка і з ёй міліцыянты, якіх накіруе начальнік міліцыі Цэнтральнага раёну. Што такі візыт заплянаваны, вынікае зь ліста з пазнакай «тэрмінова», які палітык атрымаў напярэдадні. «Суд Цэнтральнага раёну Менску паведамляе вам, што 02.02.2009 году адбудзецца вопіс і адабраньне маёмасьці, якая належыць Лябедзьку А.В».
Паводле закону маёмасьць могуць апісаць, а потым і забраць для пакрыцьця запазычанасьці. За што і колькі вінны апазыцыянэр Анатоль Лябедзька беларускай дзяржаве?
Сам ён кажа: апошнім часам кожны дзень атрымлівае пра свае нібыта даўгі новыя зьвесткі.
«Спачатку ў мяне было адчуваньне, што гэта зьвязана з Эўрапейскім маршам, бо гэта не першая падобная позва і ўсе яны былі зьвязаныя з маршам. Але зараз мне сказалі, што гэта зьвязана з аплатай майго харчаваньня ў ізалятары на вуліцы Акрэсьціна летась у верасьні. Але гэта не адпавядае рэчаіснасьці, бо ў верасьні я быў на волі, чым вельмі цешуся».
Паводле Анатоля Лябедзькі, штраф у 2 мільёны рублёў, які накладзены на яго, а таксама на іншых палітыкаў разам за Эўрапейскі шлях кастрычніка 2007‑га году даўно аплачаны. Што да турмы на Акрэсьціна, то спадар Лябедзька згадаў: ён адбыў 15 дзён ў ізалятары яшчэ ў студзені мінулага году. Паводле зьвестак, за харчаваньне яму выставілі рахунак у 60 тысяч рублёў. Гэта — менавіта тыя грошы, з‑за якіх у яго зьбіраюцца апісаць маёмасьць, ці нейкія іншыя, палітык дагэтуль ня ведае.
«Зьбіраюся зьвярнуцца да Генэральнага пракурора Пятра Міклашэвіча, каб ён навёў парадак з гэтымі справамі аб спагнаньні.Бо мала таго, што я лічу рашэньні незаконнымі. Але нават у такім выпадку: у паперы мусілі пазначыць, якое рашэньне суду, колькі я вінны, каму. А то ж нічога няма — забярэм маёмасьць і ўсё».
Старэйшая судовая выканаўца Цэнтральнага суду Менску Сьвятлана Яўфіменка на маю просьбу паведаміць, колькі грошай і за што вінны Анатоль Лябедзька, адказала наступнае.
«Ведаеце, гэтую інфармацыю мы даем толькі бакам. Калі вы зьяўляецеся ягоным прадстаўніком, пакажыце даверанасьць і тады можаце азнаёміцца са справай».
Што ў хаце Анатоля Лябедзькі ёсьць такога, чаго ён сапраўды баіцца згубіць?
Мэбля, тэлевізар, кампутар? Палітык сказаў, што найбольш даражыць катом Цішкам і вельмі спадзяецца — мурлыку ўсё ж не апішуць судовыя выканаўцы.
Цяпер чытаюць
Мастакоў Рымашэўскага і Шчамялёву пратрымалі амаль год у СІЗА, але далі такі тэрмін, каб у судзе адпусціць дадому4
Каментары