Ад пачатку зімы снегаплавільная станцыя, што знаходзіцца на вуліцы Машынабудаўнікоў, перапрацавала 285 тысяч тон снегу.
Сюды самазвалы няспынна звозяць снег.
«Станцыя можа ўтылізаваць за суткі каля 5 тысяч кубоў снегу. Гэта 333 «МАЗы». Калі ўсё ідзе без тэхнічных перапынкаў і затрымак, у некаторыя дні прымаем 350 і нават 400 грузавікоў. Але прыпынкі на прафілактыку і агляд, а таксама ачыстку прыёмнай камеры неабходныя», — распавёў намеснік начальніка ўчастка прадпрыемства Уладзімір Рубец «Мінск-Навінам».
Снег адпраўляюць у сепаратар-драбнілку, дзе яго растоплівае сцёкавая цёплая вада ў 16 градусаў. Яна паступае сюды з каналізацыйна-помпавай станцыі і па крузе адпраўляецца назад у калектар.
Трэба таксама адсочваць разгрузку. У кузаве могуць быць камяні, галіны і іншае буйное смецце, якое можа пашкодзіць абсталяванне.
У часе плаўлення снегу пясок асядае на дно. Па меры напаўнення яго разам са смеццем выгружаюць у кантэйнер, а затым вывозяць на адзін з палігонаў цвёрдых бытавых адходаў прадпрыемства «Экарэс».
Кожны самазвал разгружаецца ў сярэднім за 2-3 хвіліны. Снег апрацоўваецца бесперапынна. Сёлета ад пачатку зімовага сезону і па 10 лютага тут утылізавалі каля 53 тысяч кубоў снегу. Летась за ўвесь сезон — усяго 150 кубоў.
У канцы сакавіка станцыя рыхтуецца да кансервацыі.
Цяпер чытаюць
Затрыманы экс-кіраўнік РРБ-Банка Віталь Дранкевіч, у мінулым сам следчы1
Каментары