Мяркуецца ўвесці пакаранне за прыналежнасць салдат тэрміновай службы за сяброўства ў палітычных партыях.
У Беларусі мяркуецца ўвесці адказнасць для вайскоўцаў тэрміноввай службы за ўдзел у дзейнасці палітычных партый. Пра гэта заявіў міністр абароны Леанід Мальцаў 8 кастрычніка, адказваючы на пытанні журналістаў у Палаце прадстаўнікоў Нацыянальнага сходу Беларусі.
Паводле яго слоў, норма, якая забараняе ўдзел салдат у дзейнасці палітычных партый, утрымліваецца ў праекце закона «Аб статусе вайскоўцаў», які Палата прадстаўнікоў прыняла 8 кастрычніка ў першым чытанні.
Мальцаў падкрэсліў, што грамадзяне, якіх прызываюць на ваенную службу, павінны прыпыніць сваё членства ў палітычных партыях і іншых арганізацыях, якія пераследуюць палітычныя мэты. Ён падкрэсліў, што салдаты, якія адмовіліся гэта зрабіць,
«будуць прыцягнуты да адказнасці ў адпаведнасці з заканадаўствам».
Мальцаў адзначыў, што ў цяперашнім законе аб статусе вайскоўцаў, прынятым яшчэ ў 1992 годзе, таксама ўтрымліваецца забарона на ўдзел у дзейнасці палітычных партый вайскоўцаў.
Акрамя таго, у новым законапраекце, будзе захавана норма, якая забараняе вайскоўцам удзельнічаць у забастоўках або іншых акцыях, прыпыняючы сваю службу. «Але не на службе, у вольны час, гэта не забараняецца», — сказаў Мальцаў.
Адказваючы на пытанне журналістаў аб маладзёжных актывістах, прызваных на тэрміновую службу, Мальцаў заявіў: «У нас разважанні на тэму палітычнага прызыву нічога агульнага з рэальнасцю не маюць. Мы дзейнічаем дакладна ў межах заканадаўства. Для нас ёсць грамадзянін Беларусі, а не член палітычнай партыі, і мы прызываем яго паводле заканадаўства».
Апошнім часам у беларускую армію на тэрміновую службу былі прызваны грамадскія актывісты Франак Вячорка, Дзмітрый Жалезнічэнка, Алесь Каліта, Віталь Каратыш, Дзмітрый Федарук, Іван Шыла, Алесь Краўчэня, Яўген Скрабец і Андрэй Цянюта. Праваабаронцы заявілі, што ўлады Беларусі праводзяць «палітычны прызыў», пры гэтым парушаюць закон, у тым ліку фальсіфікуюць вынікі медыцынскіх даследаванняў.
Цяпер чытаюць
Жыхары Грушаўкі і Міхалова застаюцца без дэпутаткі: чэмпіёнка Мірончык-Іванова збіраецца ў дэкрэт18
Каментары