У расійскай Дзярждуме лічаць, што «Архіпелаг ГУЛАГ» не вытрымаў выпрабавання часам
У расійскай Дзярждуме прапанавалі прыбраць са школьнай праграмы па літаратуры «Архіпелаг ГУЛАГ» Аляксандра Салжаніцына і іншыя творы, якія, маўляў, «не вытрымалі выпрабавання часам». Замест іх прапануецца вярнуць творы прасавецкіх аўтараў.
«У гэтым годзе будуць унесеныя неабходныя змены ў школьную праграму па літаратуры, і як мінімум цэлы шэраг твораў савецкіх аўтараў, у тым ліку «Маладая гвардыя» Аляксандра Фадзеева, твор Юрыя Бондарава «Гарачы снег», павінны вярнуцца ў школьную праграму.
Тыя творы, якія не вытрымалі выпрабавання часам, якія не адпавядаюць рэчаіснасці, «сплетни в виде версий», як Высоцкі пісаў і спяваў, без усялякага сумневу павінны быць са школьнай праграмы выключаныя», — цытуе ТАСС словы першага намесніка кіраўніка фракцыі «Адзінай Расіі» ў Дзярждуме Дзмітрыя Вяткіна.
Вяткін падкрэсліў, што ў Дзярждуме, маўляў, не збіраюцца «секчы з пляча», але маюць намер аднавіць гістарычную справядлівасць у дачыненні да савецкіх твораў, якія выхоўваюць пачуццё патрыятызму і захоўваюць гістарычную памяць.
«Як паказаў гістарычны аналіз «Архіпелага ГУЛАГа», які пакуль яшчэ не прыбралі, а я думаю, нядоўга засталося яму знаходзіцца ў школьных праграмах.
Многія факты Аляксандрам Ісаевічам былі «высмактаныя з пальца», прыдуманыя. Гісторыкі правяралі ўсе факты. Была спроба атрымаць за гэта прэмію — за тое, што ён запэцкаў у брудзе сваю ўласную радзіму», — сказаў Вяткін.
Пры гэтым варта адзначыць, што раман Аляксандра Салжаніцына «Архіпелаг ГУЛАГ», які распавядае пра сталінскія рэпрэсіі, быў уключаны ў абавязковую школьную праграму ў 2009 годзе па даручэнні Уладзіміра Пуціна. Ды і сам Салжаніцын, які памёр 3 жніўня 2008 года, агульную мову з Пуціным пры сваім жыцці знаходзіў.
Сваё даручэнне Пуцін, які займаў тады пасаду прэм'ер-міністра, даў пасля сустрэчы з удавой пісьменніка, Наталляй Салжаніцынай. Гаворачы пра выданне скарочанага варыянта кнігі, яна тады выказала надзею, што тыя, у каго «няма часу на тры тамы, стануць неяк мудрэйшыя і мацнейшыя, калі гэта прачытаюць».
Пуцін з гэтым пагадзіўся, назваўшы «Архіпелаг ГУЛАГ» запатрабаванай кнігай. «І без ведання таго, што тут выкладзена, у нас не будзе поўнага ўяўлення пра нашу краіну і мы з цяжкасцю зможам думаць пра будучыню», — адзначаў ён.
Цяпер чытаюць
Пяць пытанняў, якія застаюцца пасля смерці экс-выкладчыка БНТУ Шчукіна, што ўцякаў ад міліцыі3
Каментары
Діды сідзелі, і мы пасядзім!