Сонцаахоўны крэм: кітайскія навукоўцы стварылі лепшы і больш бяспечны

Навукоўцы з Кітая паведамляюць, што яны пачалі распрацоўваць тое, што магло б стаць першым з новага і ўдасканаленага пакалення сонцаахоўных сродкаў. На мышах іх эксперыментальны палімер забяспечваў большую абарону ад ультрафіялетавага выпраменьвання, чым камерцыйныя прадукты. Ён таксама не пранікаў у скуру і, здаецца, не ўяўляў небяспекі для каралаў.

Эксперыментальны сонцаахоўны крэм быў распрацаваны даследчыкамі з Універсітэта Цінхуа ў Пекіне. Выкарыстоўваючы хімічную рэакцыю, вядомую як рэакцыя Біджынэлі, каманда стварыла малекулы ў форме кола, падобныя да аднаго з распаўсюджаных інгрэдыентаў, які сёння выкарыстоўваецца ў сонцаахоўных крэмах. Затым даследчыкі злучылі малекулы ў розныя растваральныя ў вадзе структуры, стварыўшы больш буйныя малекулы палімераў, з якіх была адабраная найбольш перспектыўная на падставе яе здольнасці паглынаць ультрафіялетавае выпраменьванне.

У наступных тэстах на мышах выявілася, што эксперыментальны фільтр больш эфектыўна прадухіляе апёкі скуры, звязаныя з ультрафіялетам, у параўнанні з двума распаўсюджанымі сёння сонцаахоўнымі сродкамі. Да таго ж не было выяўлена доказаў таго, што ў скуру мышэй пранік палімер, чаго даследчыкі чакалі з-за большага памеру яго малекул. І нарэшце, калі палімерам уздзейнічалі на свабодна плаваючыя водарасці і каралы, то яны ад кантакту з палімерам не мяняліся. 

Між тым пры ўздзеянні на каралы аксібензону і іншых падобных злучэнняў, якія выкарыстоўваюцца ў сучасных сонцаахоўных крэмах, назіраецца так званае выбельванне каралаў — гэта з'ява, пры якой каралы «выганяюць» багавінне, што расце на іх, і часта пасля гэтага гінуць.

Павялічыць

Некалькі даследаванняў апошніх гадоў, якія даказалі гэтую з’яву, нават прывялі да таго, што ў некаторых месцах (напрыклад, на Гаваях) забаранілі сонцаахоўныя крэмы з блізкімі да аксібензону кампанентамі. Але, як часта бывае, навуковая дыскусія наконт дакладнай шкоды гэтых сонцаахоўных крэмаў для акіянаў дагэтуль трывае. Большая частка даследаванняў была праведзена ў лабараторных умовах, якія моцна адрозніваюцца ад прыродных; некаторыя навукоўцы сцвярджаюць, што вышэйзгаданыя хімікаты, якія трапляюць у навакольнае асяроддзе, моцна разбаўленыя і ў горшым выпадку могуць аказаць нязначны ўплыў на каралавыя рыфы.

Апроч гэтага, як распавядае Gizmodo, нядаўнія даследаванні таксама паказваюць, што некаторыя інгрэдыенты сучасных сонцаахоўных крэмаў лёгка пранікаюць праз скуру ў нашу кроў. А некаторыя сонцаахоўныя крэмы нават нядаўна былі адкліканыя з-за больш высокага за рэкамендаваны ўзровень канцэрагену бензолу. Але зноў жа ёсць некаторыя агаворкі: гэтыя даследаванні не паказалі сувязі паміж якімі-небудзь праблемамі са здароўем і ўздзеяннем хімічных рэчываў, якія пранікаюць у арганізм праз сонцаахоўныя крэмы. Таму, улічваючы ўжо дакладна выяўленую рызыку ўздзеяння на арганізм ультрафіялету, навукоўцы раяць усё ж выкарыстоўваць любыя існуючыя сёння сонцаахоўныя крэмы, чым іх поўнасцю пазбягаць, хаваючыся ў цені.

• 7
• 0
• 0
• 1
• 0
• 0
• 0
• 0