Арганізатары «Еўрафэсту» спрабуюць высветліць інфармацыю аб расследаванні вынікаў галасавання на фінале конкурсу
Арганізатар «Еўрафэсту» — Белтэлерадыёкампанія — спрабуе высветліць, ці сапраўды вядзецца расследаванне вынікаў галасавання на фінале конкурсу.
Пакуль у арганізатараў нацыянальнага адбору на міжнародны конкурс «Еўрабачанне-2012» няма афіцыйнага пацвярджэння таму, што такі разбор вядзецца, заявіла БелаПАН крыніца ў Белтэлерадыёкампаніі. «Пра гэтыя падзеі стала вядома з інтэрнэту. У нас няма ні паперы, ні прадпісання, нічога афіцыйнага, што пацвярджала б гэты факт. Мы звярнуліся ў Адміністрацыю прэзідэнта, але нам не адказалі», — сказаў суразмоўца.
Арганізатары «Еўрафэсту» спадзяюцца, што ў найбліжэйшыя дні «штосьці праясніцца».
Нагадаем, па выніках фіналу «Еўрафэсту», які адбыўся 14 лютага, было аб'яўлена, што Беларусь на «Еўрабачанні-2012» у Баку будзе прадстаўляць спявачка Алёна Ланская. Паводле правілаў конкурсу, пераможца вызначалася шляхам падсумоўвання вынікаў галасавання тэлегледачоў і прафесійнага журы. Вядучыя «Еўрафэсту» абвясцілі ўжо падсумаваныя галасы.
16 лютага партал TUT.BY распаўсюдзіў інфармацыю аб тым, што з-за неадназначнай рэакцыі грамадскасці на вынікі фіналу «Еўрафэсту» Аляксандр Лукашэнка распарадзіўся разабрацца, наколькі аб'ектыўна быў вызначаны пераможца конкурсу, і для гэтага створана спецыяльная камісія, куды нібыта ўвайшлі прадстаўнікі шэрагу міністэрстваў і ведамстваў, у тым ліку спецыялісты па абароне інфармацыі.
У РУП «Белтэлекам», якое забяспечвала тэлефоннае галасаванне гледачоў, каментаваць сітуацыю адмовіліся.
16 лютага Белтэлерадыёкампанія паабяцала ў найбліжэйшыя дні размясціць на сваім сайце расшыфроўку тэлефоннага галасавання, аднак гэта і цяпер не зроблена.
Тым часам 18 лютага ў некаторых СМІ з'явілася інфармацыя аб тым, што ў межах расследавання дапытваюць членаў журы.
На просьбу БелаПАН пракаментаваць гэтыя звесткі старшыня журы, кіраўнік праекта «Еўрафэст» Аляксандр Ціхановіч заявіў: «Ні пра якія камісіі не ведаю. "Еўрафэст" не займаўся галасаваннем — галасаваннем займаліся правайдары. Нам далі вынікі — і іх проста вядучыя агучылі. Я быў старшынёй журы і магу толькі сказаць, што нашы меркаванні разышліся: журы прагаласавала за Litesound (гурт заняў у фінале другое месца. — БелаПАН.), а тэлегледачы — за Ланскую».
Цяпер чытаюць
Жыхары Грушаўкі і Міхалова застаюцца без дэпутаткі: чэмпіёнка Мірончык-Іванова збіраецца ў дэкрэт18
Каментары