У сераду, 11 лютага, ў 19:00 дыскусійны кінаклуб BLOW UP запрашае на прагляд і абмеркаванне легендарнага дакументальнага фільма «Аракіментары».
Фільм прысвечаны самаму вядомаму з азіяцкіх фатографаў – эксцэнтрычнаму Набуёсі Аракі (нар. 1940), які атрымаў шырокую вядомасць дзякуючы правакацыйным работам, што парушаюць традыцыйныя табу японскага грамадства і часта перасякаюць мяжу дазволенага ў жанры эратычнай фатаграфіі.
Улюбёныя тэмы Аракі — кветкі, неба, жанчыны і дзеці. Але нават фатаграфіі кветак у Аракі настолькі неадназначныя, што выклікаюць скандалы на фотавыставах.
За сваё творчае жыццё Аракі выдаў больш за 250 фотаальбомаў, распачаўшы выдавецкую актыўнасць з самавыдавецкага праекту «Ксеракапіяваныя фатаграфіі» (1970), абмежаваны наклад якога ён разаслаў сябрам, крытыкам і выпадковым людзям, чые адрасы былі знойдзены ў тэлефоннай кнізе. Тэмай фотаальбома былі твары самых звычайных жыхароў Токіа.
На рахунку фатографа вялікая колькасць персанальных выстаў у Амерыцы і шматлікіх краінах Еўропы. У Японіі выстаўкі Аракі часта зачыняліся, работы канфіскоўваліся, а з фатографа спаганяліся штрафы. Але гэта не спыняла майстра і толькі спрыяла росту ягонай папулярнасці як у Японіі, так і ва ўсім свеце.
Назва: «Аракіментары» (Arakimentari) Год выпуску: 2004 Краіна: ЗША Рэжысёр: Трэвіс Клазэ Жанр: дакументальны, біяграфія Працягласть: 01:14:48 Мова: японская + ангельская Пераклад: рускія субтытры
У здымках фільма бралі ўдзел: Б'ёрк, Такешы Кітана
Фільм толькі для дарослай аўдыторыі! 18+!
Цэнтр сучасных мастацтваў
адрас: г. Мінск, Някрасава, 3
Цяпер чытаюць
Колькі сёлета трацілі на вяселлі ў Беларусі? Сабралі рэальныя лічбы тых, хто пабываў у ЗАГСе7
Каментары