Турэцкія ўлады выдалі ордар на арышт апазіцыйнага прапаведніка Фетхулы Гюлена па справе аб спробе дзяржаўнага перавароту, паведамляюць мясцовыя СМІ.
Суд у Стамбуле пастанавіў завочна арыштаваць Гюлена, які жыве ў ЗША, абвінаваціўшы яго ў арганізацыі бунту 15 ліпеня, паведаміла дзяржаўнае агенцтва «Анадалу».
Турцыя неаднаразова заклікала Злучаныя Штаты экстрадаваць Гюлена. Ён адмаўляе сваю датычнасць да спробы перавароту.
Пасля спробы путчу па краіне пракацілася хваля арыштаў і звальненняў. У прыватнасці, з войска былі звольненыя каля 1700 вайскоўцаў, абвінавачванні ў спробе звяржэння ўлады былі прад'яўленыя 99 генералам і адміралам узброеных сілаў.
Фетхула Гюлен лічыцца ў Турцыі другім па ўплыве чалавекам пасля прэзідэнта Рэджэпа Таіпа Эрдагана. Яны былі паплечнікамі, калі апошні прыйшоў да ўлады, аднак потым іх шляхі разышліся.
У чацвер Эрдаган паабяцаў «абрэзаць усе дзелавыя сувязі» і «пазбавіць даходаў» усе кампаніі, звязаныя з Гюленам.
Каментары