22-гадовая Настасся Малашчанка адпрацавала педагогам менш за год.
Дзяўчына жыла разам з бацькам ў Ельску, а працавала ў школе суседняй вёскі Валаўск. Настасся скончыла Мазырскі педуніверсітэт імя Івана Шамякіна, працаваць пачала яшчэ падчас вучобы. Маладая настаўніца выкладала хімію і біялогію.
«Мяне прынялі ў школе як родную, — распавяла Настасся мясцоваму выданню «Народны голас». — Справа ў тым, што, быўшы на чацвёртым курсе ўніверсітэта, я цалкам паспяхова сумяшчала вучобу і працу ў валаўскай школе, дзе ў той час патрабаваўся настаўнік хіміі і біялогіі. Прызнаюся, першыя крокі ў прафесіі даваліся мне нялёгка. Мяне раздзіралі падвойныя пачуцці. З аднаго боку — цікава было рыхтавацца да ўрокаў, мець зносіны з вучнямі, разам з імі шукаць адказы на адвечныя пытанні: «Што такое дабро?» і «Што такое зло?». З іншага боку — перажывала, каб яны засвоілі матэрыял, каб дзецям цікава было на маіх уроках. Баялася памыліцца, не справіцца са сваёй працай, упусціць штосьці важнае, не апраўдаць чаканняў вучняў і іх бацькоў. Дзякуй, вядома ж, старэйшым калегам і дырэктару за разуменне і падтрымку, за слушныя парады і ненадакучлівыя падказкі.
На шчасце, ужо тады зразумела, што на правільным шляху, што вучыць дзяцей мне падабаецца, і што, нягледзячы ні на што, я люблю свае прадметы — хімію і біялогію. Хімічныя рэакцыі і задачы, шматстайны свет жывых істот, якія ўзаемадзейнічаюць з навакольным асяроддзем, цікавыя мне не толькі як настаўніку».
У канцы красавіка Настасся захварэла — пачыналася ўсё як звычайная прастуда.
«Яна перастала хадзіць на працу. Але спачатку ўсё было не так сур’ёзна. З часам развіліся нейкія ўскладненні, як кажуць, можа, ад нейкіх медыкаментаў… У выніку пачалася пнеўманія», — кажуць калегі маладой настаўніцы.
Настассю шпіталізавалі. Спачатку яна ляжала ў ельскай бальніцы, пасля яе перавялі ў Гомель. Але выратаваць дзяўчыну не змаглі, днямі яна памерла.
«Дакладная прычына смерці пакуль невядомая. Але каранавіруса ў яе не было дакладна — рабілі некалькі тэстаў, усе адмоўныя. Таму хаваць будуць у адкрытай труне, на развітанне паедуць педагогі», — кажуць у школе.
Пахаваюць Настассю Малашчанка 9 чэрвеня.
Каментары