Беларускі афіцэр пра словы Лукашэнкі: Беларускіх салдат адправяць ваяваць, калі Расія будзе прайграваць
«Мы тут апраўдвацца не будзем з нагоды таго, што мы ўдзельнічаем, не ўдзельнічаем у гэтым канфлікце. Нашых войскаў там няма. Але калі трэба будзе, калі гэта будзе неабходна Беларусі і Расіі, яны будуць», — сказаў сёння Лукашэнка. Дзейны высокапастаўлены афіцэр патлумачыў «Нашай Ніве», як гэта трэба разумець.
«Пачынаюць вайну, думаючы пра перамогу, натуральна. Але ў выпадку негатыўнага для Расіі развіцця падзей, думаю, відавочна, што і нашы войскі (тэхніка і жывая сіла) таксама возьмуць удзел — нагоду знойдуць.
Мы ж «найбліжэйшы саюзнік», і, што важна, — найбліжэйшы да Кіева саюзнік па адлегласці да яго.
Іншымі словамі, калі Расія будзе цярпець паразу і не дасягаць мэт уласнымі сіламі, то Лукашэнку прыйдзецца ахвяраваць жыццямі і беларускіх салдат, у нас адносна вялікае войска, якое можа паўплываць на ход канфлікту.
Ці зможа гэтаму супраціўляцца Лукашэнка? Ён свой выбар ужо зрабіў, прадаставіўшы плацдарм. Пра тое, што беларускі бок не ўдзельнічае ў канфлікце, нашы генералы могуць заліваць, як той казаў, «самым маленькім».
Чытайце таксама: Лукашэнка: Нашых войскаў ва Украіне няма. Але калі гэта будзе неабходна Беларусі і Расіі, яны будуць
«Пуцін скажа — ён зробіць, — мяркуе афіцэр. — Іншая рэч, што беларускія афіцэры і салдаты, у адрозненне ад рускіх, асабліва не разумеюць, чаму трэба ваяваць з Украінай. Заварваецца такая каша, што няясна, ці дастанем мы ў выніку з каструлі», — сказаў вайсковец.
На думку афіцэра, у выпадку адпраўкі беларускіх вайскоўцаў ва Украіну будуць задзейнічаныя як кантрактнікі, так і салдаты тэрміновай службы. «Уперамешку, згодна з камплектам. Толькі кантрактнікаў на Украіну не хопіць», — мяркуе ён.
Чаго чакае Польшча ад Мінска і ці закрые зноў мяжу на гэтым тыдні?26
Каментары