Прэзідэнт Туркменістана Гурбангулы Бердымухамедаў упершыню наведае Беларусь з афіцыйным візітам 25—26 студзеня.
Пра гэта ён паведаміў 22 студзеня на пасяджэнні Кабінета міністраў, на якім абмяркоўваліся пытанні падрыхтоўкі візіту.
«Праграма гэтага візіту вельмі насычаная, што сведчыць аб тым значэнні, якое надаецца ўмацаванню адносінаў і ўсебаковаму пашырэнню супрацоўніцтва нашай краіны з Рэспублікай Беларусь», — цытуе Бердымухамедава агенцтва Регнум Новости.
На яго думку, «туркмена‑беларускае партнёрства мае багаты пазітыўны вопыт сумеснай працы, назапашаны апошнімі гадамі, і салідны патэнцыял, які неабходна задзейнічаць у поўнай ступені». У сувязі з гэтым Бердымухамедаў даручыў адпаведным кіраўнікам «забяспечыць выніковасць гэтага візіту і перамоў на вышэйшым узроўні, закліканых надаць традыцыйнаму міждзяржаўнаму дыялогу новую дынаміку развіцця, якая адпавядае ўзаемным інтарэсам».
«Варта адзначыць важнасць працы туркмена‑беларускай міжурадавай камісіі ў кантэксце актывізацыі і дыверсіфікацыі ўзаемавыгадных двухбаковых сувязей, нарошчвання тавараабароту паміж дзвюма краінамі, у тым ліку за кошт пашырэння наменклатуры тавараў, а таксама павелічэння аб’ёмаў экспарту прадукцыі айчынных вытворцаў», — сказаў ён.
Як раней паведамлялася, Аляксандр Лукашэнка асабіста запрасіў Гурбангулы Бердымухамедава наведаць Беларусь падчас візіту ў Туркменістан у чэрвені 2009 года.
***
Тады паводле вынікаў перамоў кіраўнікі дзяржаў падпісалі пратакол да пагаднення аб доўгатэрміновым супрацоўніцтве ў сферы паставак у Туркменістан сельскагаспадарчай, аўтамабільнай, аўтобуснай і іншай тэхнікі, заключанага ў маі 2002 года ў Ашгабадзе, а таксама сумеснае камюніке.
Быў заключаны кантракт на закупку трактароў «Беларус» і запчастак да іх. Беларусь на працягу дзевяці месяцаў павінна паставіць у Туркменістан 1,5 тыс. адзінак тэхнікі МТЗ на 33 млн. даляраў.
Падпісаны пагадненні аб міжнародных аўтамабільных пасажырскіх і грузавых зносінах, аб супрацоўніцтве ў эканамічнай сферы, у мытных справах, аб супрацоўніцтве і ўзаемнай дапамозе па пытаннях выканання падатковага заканадаўства, а таксама ў сферы спорту і турызму, друку і інфармацыі, навукі і тэхналогій, культуры, адукацыі, аховы здароўя і медыцынскай навукі.
Паводле звестак беларускай статыстыкі, Туркменістан па аб’ёме тавараабароту і экспарту беларускай прадукцыі займае сёмае месца сярод краін СНД. У 2008 годзе тавараабарот паміж краінамі склаў амаль 50 млн. даляраў, за чатыры месяцы 2009 года — 12,4 млн. даляраў.
У структуры беларускага экспарту ў Туркменістан асноўную долю складаюць трактары, дарожная тэхніка, грузавыя аўтамабілі, а таксама пластмасавая тара, тканіны, галаўныя ўборы, формы для металаліцейнай вытворчасці.
Афіцыйна пацвердзіць інфармацыю пра візіт прэзідэнта Туркменістана ў Беларусь пакуль не ўдалося.
Каментары