Калі вы любіце натуральныя альтэрнатывы агрэсіўнай хіміі, звярніце ўвагу на воцат. Гэта даступны сродак, які проста выкарыстоўваць такім спосабам, пры якім не толькі нейтралізуюцца кепскія пахі, але і паветра ачышчаецца.
Воцат у спалучэнні з кропляй эфірнага алею — гэта вельмі эфектыўны сродак.
Воцат — прадукт, які традыцыйна атрымліваецца ў выніку мікрабіялагічнага сінтэзу з дапамогай воцатнакіслых бактэрый з харчовай сыравіны, якая ўтрымлівае спірт. Існуе некалькі відаў воцату: белы, яблычны, вінны, бальзамічны. Але менавіта звычайны 9% харчовы воцат — найбольш эфектыўны для нейтралізацыі пахаў.
У адрозненне ад шматлікіх дэзадарантаў, якія толькі маскіруюць пахі, перабіваючы іх сінтэтычнымі водарамі, воцат уздзейнічае на саму прычыну — ён хімічна нейтралізуе пахі. Гэта адбываецца дзякуючы воцатнай кіслаце, якая рэагуе з лятучымі злучэннямі, што выклікаюць непрыемны пах. У выніку паветра ў памяшканні становіцца не проста «прыемным», а сапраўды чыстым ад пахаў.
Асноўны метад пазбавіцца непрыемных пахаў — паставіць шклянкі з воцатам у тых месцах, дзе пахі найбольш адчувальныя, і пакінуць на ноч або нават на некалькі дзён (калі пах асабліва ўстойлівы). Пасля выкарыстання воцат неабходна выліць і, калі трэба, замяніць на свежы.
Для невялікіх і замкнёных прастораў, такіх як шуфляды ці шафы, можна выкарыстаць просты метад: намачыць скамечаную паперу воцатам і пакласці яе ўнутр. Яна будзе паглынаць затхлыя пахі.
Як вывесці пах цыгарэт воцатам
Змяшайце воцат і ваду ў прапорцыі 1:1 у пульверызатары і распыліце на тэкстыль і мэблю (але спачатку праверце на малым участку).
Калі адзенне прасякнута дымам — напрыклад, пасля вогнішча або знаходжання ў пакоі, дзе курылі, — воцат таксама прыйдзе на дапамогу. Проста дадайце адну шклянку воцату ў адсек для паласкання вашай пральнай машыны.
Як вывесці пах жывёл воцатам
Пах хатніх жывёл (у тым ліку мачы) — яшчэ адна распаўсюджаная праблема, якую можна вырашыць з дапамогай воцату.
Змяшайце 1 частку воцату і 2 часткі вады, дадайце 3—5 кропель эфірнага алею (лаванда, мята, лімон) і апрацуйце дываны, коўдры або месцы, дзе жывёлы часта бываюць.
Як вывесці пах ежы воцатам
Смажанае, вострае, рыба — усё гэта можа трымацца ў паветры некалькі дзён. Каб пах знік, змяшайце ў каструлі паўшклянкі воцату і адну шклянку вады. Раствор трымайце на слабым агні на працягу некалькіх гадзін. Не накрывайце крышкай — пара павінна свабодна выходзіць у паветра. У раствор можна дадаць гваздзікі або цытрусавую цэдру — эфект будзе больш прыемны. Пры гэтым важна забяспечыць дастатковую вентыляцыю.
Як воцатам вывесці цвіль і сырасць
Змяшайце роўныя часткі воцату і вады, дадайце дзве-тры кроплі алею чайнага дрэва (мае антыгрыбковы эфект), і распыліце на сырыя месцы: сцены, куты, ванную, заднюю сценку шафы.
Меры засцярогі пры выкарыстанні воцату
Хоць воцат з'яўляецца бяспечным і натуральным сродкам, пры яго выкарыстанні для выдалення пахаў важна выконваць некаторыя меры засцярогі:
• Не выкарыстоўвайце воцату на паверхнях з мармуру ці граніту, бо кіслата псуе, раз'ядае паверхню.
• Не змешвайце воцату з адбельвальнікам, бо гэта можа прывесці да ўтварэння шкодных пароў.
• Перш чым выкарыстоўваць на новых тканінах або паверхнях прыгатаваны раствор, пратэсціруйце на невялікім участку.
• Не выкарыстоўвайце воцату на паверхнях, пакрытых воскам або алеем, бо ён можа выдаліць гэты ахоўны слой.
Цяпер чытаюць
На абедзе Лукашэнкі і Сі Цзіньпіна прысутнічала і адзіная дачка кітайскага лідара11
Каментары