Кандыдат Правальскі сабраў амаль усе подпісы ў адным раёне Віцебска.
Віцебскі прадпрымальнік Уладзімір Правальскі падаў у выбаркам 109 тысяч подпісаў. Самае цікавае, старшыня ЦВК Лідзія Ярмошына кажа, што ўсе свае подпісы на тэрыторыі аднаго раёна — Першамайскага ў Віцебску. Агулам там выбарцаў 115 тысяч. Толькі 6 тысяч не падпісалі.
«Наша Ніва»: Праўда, што подпісы збіралі толькі ў адным Першамайскім раёне?
Уладзімір Правальскі: Ды не, не праўда. Збіралі яшчэ ў Наваполацку, Полацку, Мёрах, Чыгуначным і Кастрычніцкім раёнах Віцебска.
«НН»: А дзе найбольшыя паказчыкі?
УП: У Першамайскім. Там сабралі прыкладна 107–108 тысяч.
«НН»: Ого. І як так выйшла?
УП: Ну мы прадпрымальнікі дзейнічаем так, каб найменш можна было выдаткаў і атрымаць ад гэтага найбольшы эфект.
«НН»: Думаеце, Вас зарэгіструюць?
УП: А што тут думаць? Мы выканалі сваю працу. Другога рашэння проста не можа быць.
«НН» Разлічваеце перамагчы?
УП: Вядома. Верым у гэта. Узважылі ўсё добра перад тым, як балатавацца. Разумеце, Лукашэнка ўжо састарэў. Людзі хочуць новага.
«НН»: А сярод апазіцыі добрых кандыдатаў няма?
УП: Яны і называюць сябе апазіцыяй, бо не могуць пахваліцца ніякімі рэальнымі дасягненнямі.
«НН»: А вы можаце?
УП: Я найлепшы прадпрымальнік краіны.
«НН»: Якая ў вас праграма?
УП: У дзяржаве, каб нармальна функцыянаваць павінны быць дзве рэчы. Першае — яна павінна ўмець зарабляць грошы. Другое — павінна быць свая мова. У нас няма ні таго, ні другога. Я вырашу гэтыя праблемы.
***
Уладзімір Правальскі нар. 14 студзеня 1959 у вёсцы Сцяпурава (цяпер Сенненскі раён Віцебскай вобласці). Жанаты, мае двух дарослых дзяцей. Пасля заканчэння Віцебскага політэхнічнага тэхнікума (1978) да 1991 працуе ў будаўніцтве. Пачынаў бетоншчыкам, скончыў дырэктарам асацыяцыі будаўнічых каапэратываў Віцебскай вобласці. Ад 1991 — індывідуальны прадпрымальнік. Пераможца рэспубліканскага конкурсу «Найлепшы прадпрымальнік 2009 года» ў намінацыі «Найлепшы прадпрымальнік у сферы паслуг».
Цяпер чытаюць
Колькі сёлета трацілі на вяселлі ў Беларусі? Сабралі рэальныя лічбы тых, хто пабываў у ЗАГСе7
Каментары