У цэнтры ўвагі дэпутатаў — піва і цыгарэты

2 красавіка ў Менску адкрылася вясновая сэсія Палаты прадстаўнікоў Нацыянальнага сходу Беларусі: за тры месяцы, часам якіх будуць працаваць дэпутаты, ім належыць прыняць 50 законапраектаў, якія зараз знаходзяцца на парадку дня.

Яшчэ столькі ж дакумэнтаў дапрацоўваюцца ў пастаянных парлямэнцкіх камісіях. Яны будуць выносіцца ў Авальную залю, як іх толькі іх падрыхтуюць да разгляду. Падчас адкрыцьця першага пленарнага паседжаньня старшыня Палаты прадстаунікоў Уладзімер Канаплёў падкрэсьліў, што ў міжсэсійны пэрыяд праведзеная грунтоўная праца, якую не прыпынілі ні мясцовыя выбары, ні работа дэпутатаў у выбарчых акругах.

Канаплёў: «Падчас сэсіі мы разгледзім комплекс мераў па паляпшэньні дэмаграфічнай сытуацыі. Працягнецца работа па разьвіцьцю заканадаўства аб правах дзіцяці. Будуць разгледжаныя праекты законаў па пытаньнях узмацненьня дзяржаўнай абароны дзяцей з праблемных сем’яў, усынаўленьня і спагнаньня алімэнтаў».

Самым важкім на сэсіі стане разгляд законапраектаў, якія маюць сацыяльную скіраванасьць. І гэта, па словах Канаплёва, не выпадкова, таму што «чалавек і ягоныя патрэбы сталі пунктам адліку ўсёй законатворчай дзейнасьці».

Вялікі рэзананс у грамадзтве, адзначыў сьпікер, выклікалі праекты законаў «Аб дзяржаўных сацыяльных ільготах, правах і гарантыях дзеля асобных катэгорыяў грамадзянаў» і «Аб прафэсійным пэнсыйным страхаваньні».

Канаплёў: «Тут спатрэбіцца максымальная прынцыповасьць і адказнасьць. Менавіта ад нашага рашэньня залежыць, ці будзе забясьпечаная сацыяльная справядлівасьць і падтрымка самых неабароненых катэгорыяў грамадзянаў».

Яшчэ адзін доўгачаканы дакумэнт — новы Кодэкс аб зямлі, які ўжо амаль два гады знаходзіцца ў камісіі па аграрных пытаньнях.

Канаплеў: «Яго прыняцьце дазволіць перайсьці да цывілізаванага мэханізму рынкавага абарачэньня зямельных участкаў. Зямлю будуць набываць па кадастравым, то бок блізкім да рынкавага, кошце».

Адразу пасьля ўрачыстага адкрыцьця пачаліся працоўныя будні. У першы дзень работы сэсіі парлямэнтары пасьпелі разгледзіць 16 пытаньняў. Але дыскусія разгарнулася толькі па адным зь іх — новай рэдакцыі закону «Аб рэкляме». Ён уводзіць шэраг абмежаваньняў на вытворцаў рэклямы. Пры гэтым, як падкрэсьліла намесьніца старшыні пастаяннай камісіі па жыльлёвай палітыцы, будаўніцтве, гандлю й прыватызацыі Ганна Бурава, законапраект улічвае міжнародны вопыт у сфэры рэклямы і спэцыфіку разьвіцьця айчыннага рэклямнага рынку, а таксама інтарэсы айчынных вытворцаў.

Бурава: «Законапраектам прадугледжваецца, што рэкляма не павінна перавышаць 20% аб’ёму вяшчаньня для радыё‑ і тэлепраграмаў на працягу сутак. Пры гэтым ад 18‑й па 22‑ю рэкляма не павінна перавышаць 30% аб’ёму вяшчаньня на працягу кожнай гадзіны».

Найбольш істотныя новаўвядзеньні тычацца рэклямы піва і тытуню. Як паведаміла Бурава, ад 1 студзеня 2008 году забараняцца рэкляма тытунёвых вырабаў, а піва, пасьля таго, як закон набудзе моц, можна будзе рэклямаваць толькі ад 7‑й раніцы да 8‑й вечара. Але шэраг парлямэнтароў нават і з гэтымі жорсткімі нормамі не пагадзіліся. Напрыклад, дэпутатка Марыя Худая палічыла іх занадта мяккімі.

Худая: «Такой колькасьці часу, як вы заклалі — 30% вяшчаньня, асабліва ў прамежак ад 18‑й па 22‑ю, калі жадаюць глядзець менавіта вэтэраны, і хочуць паглядзець добры фільм і потым пайсьці і легчы адпачываць. А гэтымі дзеяньнямі мы шкодзім здароў’ю і псыхічнаму стану нашых людзей».

Дэпутат Мікалай Дубовік таксама не задаволены процьмай рэклямы ў прайм‑тайм.

Дубовік: «Калі глядзіш які фільм, ці праграму — тут на самым цікавым месцы перарываюць фільм і паказваюць доўга і ўпарта рэкляму. У гэты час хочацца ўзяць нешта цяжкое і шпурнуць у тэлевізар. Калі б ён быў чужы, я б, пэўна, так і зрабіў».

Старшыня камісіі па правах чалавека, нацыянальных адносінах і СМІ Юры Кулакоўскі заступіўся за беларускіх вытворцаў піва і прапанаваў абмежаваць рэкляму толькі расейскіх піўных брэндаў.

Кулакоўскі: «Я жадаю, як дэпутат ад Бабруйскай выбарчай акругі, каб у нас было піва «Баброў», а не «Бачкароў» альбо «Тры кароны» і іншыя. Чаму? Мы самі сабе вынішчаем свайго вытворцу, калі забараняем рэкляму піва на сваіх каналах. А на расейскіх каналах паглядзіце, што робіцца?»

Нягледзячы на тое, што наконт новай рэдакцыі закону «Аб рэкляме» разгарнуліся вялікія спрэчкі, калі прыйшоў час галасаваць, толькі дзесяць парлямэнтароў выказаліся супраць яго прыняцьця, а 90 дэпутатаў падтрымалі дакумэнт.

Сёньня Палата прадстаўнікоў таксама прыняла ў першым чытаньні папраўкі ў закон «Аб электрасувязі». Паводле яго, парадак выкарыстаньня радыёхваляў будзе вызначацца толькі прэзыдэнтам. Таксама сёньня былі ратыфікаваныя шэраг міжнародных пагадненьняў і прынятыя да ведаму некалькі дэкрэтаў прэзыдэнта.

Кастусь Вансяцкі, Радыё Рацыя

• 0
• 0
• 0
• 0
• 0
• 0
• 0
• 0